Müxtəlif mənbələrin məlumatına görə, Tramp administrasiyası Milli Elm Şurasının (NSB) bütün heyətini vəzifədən uzaqlaşdırıb. Bu qurum ABŞ prezidentinə və Konqresə Milli Elm Fondu (NSF) ilə bağlı məsləhətlər verir. Hazırda fondun elmi tədqiqatları maliyyələşdirməsi tarixi minimum səviyyəsindədir və vəsaitlərin ayrılmasında ciddi gecikmələr müşahidə olunur.
Qeyd edək ki, Milli Elm Fondu bir çox mühüm texnologiyaların inkişafında əsas rol oynayıb. Fondun dəstəyi ilə MRT (Maqnit Rezonans Tomoqrafiyası) aparatlarında və mobil telefonlarda istifadə olunan texnologiyalar yaradılıb. Hətta məşhur "Duolingo" tətbiqinin ilk addımlarını atmasında da bu qurumun böyük payı var.
Nümayəndələr Palatasının Elm, Kosmos və Texnologiya Komitəsinin aparıcı demokrat üzvü Zoe Lofgren bu addımı kəskin tənqid edib:
"Bu, elmə və Amerikaya zərər verməyə davam edən prezidentin növbəti axmaq hərəkətidir. NSB qeyri-siyasi bir qurumdur. O, prezidentə NSF-nin gələcəyi barədə məsləhətlər verir. Təəssüf ki, ilk gündən NSF-yə hücum edən bir prezidentin Fondu istiqamətləndirməyə kömək edən şuranı məhv etməyə çalışması təəccüblü deyil. Görəsən, prezident elmdəki liderliyimizi rəqiblərimizə təhvil verərkən NSB-ni ona qarşı çıxmayacaq MAGA sadiqləri ilə dolduracaq? Bu, həqiqətən də kloun hərəkətidir."
