SpaceX şirkəti 5 avqust tarixində Florida ştatındakı Space Launch Complex 40 meydançasından növbəti uğurlu buraxılışı həyata keçirib. Falcon 9 raketi vasitəsilə orbitə BlueBird 11, BlueBird 12 və BlueBird 13 peykləri çıxarılıb. Bu missiya üçün istifadə olunan B1077 nömrəli birinci pillə artıq 30-cu uçuşunu yerinə yetirib və missiyadan sonra "A Shortfall of Gravitas" platformasına uğurla eniş edib.
"BlueBird" peykləri nə ilə fərqlənir?
AST SpaceMobile şirkəti tərəfindən hazırlanan bu peyklər texnoloji göstəricilərinə görə rekordçudur. 28 iyul tarixində "Guinness World Records" tərəfindən sertifikatlaşdırılan bu qurğular kommersiya peyklərində istifadə olunan ən böyük fazalı antena massivinə malikdir. Tam açıldıqda hər bir antenanın sahəsi 63,04 kvadrat metr təşkil edir, bu isə yüksək keyfiyyətli mobil rabitəni təmin etməyə imkan verir.
Gələcək planlar və rəqabət mühiti
Şirkət ümumilikdə 248 peykdən ibarət qlobal şəbəkə yaratmağı hədəfləyir. Bu sistem "Starlink Direct to Cell" texnologiyasına birbaşa rəqib kimi çıxış edir və istifadəçilərə xüsusi avadanlıq olmadan adi smartfonlarla peyk rabitəsindən yararlanmağa imkan verəcək. AST SpaceMobile artıq Vodafone, AT&T, Verizon və Rakuten kimi nəhəng operatorlarla tərəfdaşlıq müqavilələri imzalayıb.
