Telefonlardan tutmuş oyun konsollarına qədər bir çox cihazın qiymətinin artmasına səbəb olan RAM qıtlığının sona çatması üçün hələ uzun müddət gözləmək lazım gələ bilər. Cümə axşamı keçirilən qazanc hesabatı zamanı "Samsung" şirkəti kəskin yaddaş qıtlığı ilə bağlı yeni proqnozlarını bölüşüb. Şirkət rəsmiləri süni intellekt məlumat mərkəzlərinin tələbatı ilə yaranan bu böhranın gələn il də davam edəcəyini və vəziyyətin daha da pisləşəcəyini açıqlayıb.
"Samsung" şirkətinin yaddaş çipləri üzrə rəhbəri Kim Jaejune hesabat zamanı mövcud vəziyyətin ciddiliyini vurğulayıb. O, gələcək illər üçün tələb və təklif balansının pozulacağını qeyd edib. Rəhbər vəziyyəti belə şərh edib:
"Tədarükümüz müştəri tələbatından çox geridə qalır. Yalnız 2027-ci il üçün daxil olan mövcud tələbata əsaslanaraq deyə bilərik ki, təklif və tələb arasındakı fərq 2026-cı illə müqayisədə daha da genişlənəcək."
Şirkətin bu proqnozu, dünyanın ən böyük RAM istehsalçılarının 2030-cu ilə qədər tələbatı qarşılaya bilməyəcəyi ilə bağlı bu ayın əvvəlində yayılan hesabatlarla üst-üstə düşür. Mövcud qıtlıq fonunda istehsal prosesini ləngidə biləcək başqa bir risk də mövcuddur. Belə ki, "Samsung" rəhbərliyi 21 may tarixində 18 günlük tətilə başlamağı planlaşdıran həmkarlar ittifaqı ilə razılığa gələ bilməsə, çip qıtlığı problemi daha da kritik həddə çata bilər.
