"JPMorgan Chase" tərəfindən təşkil edilən tədbirdə "Hyundai Motor Group" rəhbərliyi ABŞ-da robototexnika strategiyasının genişləndirilməsi planlarını açıqlayıb. Şirkət "Boston Dynamics" tərəfindən hazırlanmış 25 mindən çox "Atlas" humanoid robotunu avtomobil istehsalına cəlb etməyə hazırlaşır. Rəsmi məlumata görə, 2028-ci ilə qədər hər il 30 min "Atlas" robotunun istehsalı hədəflənir. Bununla yanaşı, "Hyundai" ABŞ ərazisində robotlar üçün əzələ və oynaq funksiyasını yerinə yetirən 300 mindən çox ötürücü mexanizmin yerli istehsalını da təşkil edəcək.
Robotlar ilk olaraq hansı zavodlarda işləyəcək?
"Atlas" robotlarının "Hyundai Motor" və "Kia" şirkətlərinin əsas istehsal proseslərinə mərhələli şəkildə inteqrasiya edilməsi nəzərdə tutulur. "Kia Corporation" rəhbəri Son Ho-sun bildirib ki, ilk humanoid robotlar 2028-ci ildə Amerikanın Ccorciya ştatındakı "Hyundai Motor Group Metaplant America" müəssisəsində fəaliyyətə başlayacaq. Eyni ştatda yerləşən "Kia" zavodlarında isə bu prosesə 2029-cu ildə start veriləcək. Bu təşəbbüslər konsernin qlobal avtomatlaşdırma və robotlaşdırma proqramının mühüm bir hissəsini təşkil edir.
"Atlas" ağır yükləri necə daşıyır?
Bu ərəfədə "Boston Dynamics" şirkəti "Atlas" modelinin ağır sənaye obyektlərini daşımaq bacarıqlarını nümayiş etdirib. Təqdim olunan videoda robotun gövdəsini 180 dərəcə döndərərək mini-soyuducunu qaldırdığı və daxili çəki yerdəyişməsini avtomatik tənzimləyərək daşıdığı görünür. Mühəndislərin sözlərinə görə, bu mürəkkəb davranış modeli sınaq və səhv metoduna əsaslanan gücləndirilmiş öyrənmə texnologiyası vasitəsilə cəmi bir neçə həftə ərzində hazırlanıb. Təlimlər zamanı qrafik prosessorlarda milyonlarla saatlıq simulyasiyalar aparılıb və robot dəyişən kütlə, sürtünmə və tutma gücü kimi gözlənilməz vəziyyətlərə uyğunlaşmağı öyrənib.
Yeni texnologiyanın üstünlükləri nələrdir?
Digər humanoid platformalardan fərqli olaraq, "Atlas" yalnız kompüter görmə sistemlərinə deyil, həm də bədən mövqeyinin daxili qavrayışına (propriosepsiya) əsaslanır. Robot real vaxt rejimində müvazinətini, müqaviməti və gövdə hərəkətlərini izləyərək qeyri-sabit və ağır yüklərlə daha effektiv işləyir. "Boston Dynamics" mütəxəssisləri qeyd edirlər ki, avadanlığın sadələşdirilmiş arxitekturası və cəmi iki növ ötürücüdən istifadə edilməsi virtual təlimlə real dünya arasındakı fərqi minimuma endirib. Bu simmetrik dizayn fiziki mühitdə robotun davranış etibarlılığını əhəmiyyətli dərəcədə artırır.
