"Artemis-2" missiyasının startından 4 gün, 6 saat və 2 dəqiqə sonra "Orion" kosmik gəmisi Ayın qravitasiya təsir dairəsinə daxil olub. Bu tarixi keçid aprelin 6-sı Moskva vaxtı ilə saat 06:38-də, Aydan təxminən 62 800 kilometr, Yerdən isə 373 000 kilometrdən çox məsafədə baş tutub. Artıq gəminin hərəkətində Ayın cazibə qüvvəsi Yerin qravitasiyasını üstələyir.
Kapsulun göyərtəsində "NASA" astronavtları Rid Uayzman, Viktor Qlover, Kristina Kox və Kanada Kosmik Agentliyinin nümayəndəsi Ceremi Hansen yer alıb. Onlar 1972-ci ildə başa çatan "Apollo" proqramından 54 il sonra Yer fəzasını tərk edən 25-ci, 26-cı, 27-ci və 28-ci insanlar kimi tarixə düşüblər.
Tarixi rekord və Ay ətrafında uçuş
Missiyanın növbəti mühüm mərhələsi aprelin 6-dan 7-nə keçən gecə planlaşdırılan Ay ətrafında uçuş olacaq. Bu manevr zamanı astronavtlar Ayın səthindən 10 300 kilometr yüksəkliyə qalxaraq, Yerdən təxminən 406 000 kilometr uzaqlaşacaqlar. Bu, bəşəriyyət tarixində insanların Yerdən ən uzaq məsafəyə səyahəti kimi yeni rekord olacaq. Ayın radio siqnallarını bloklaması səbəbindən uçuş zamanı Yerlə əlaqə təxminən 40 dəqiqəlik kəsiləcək.
Sistemlərin sınağı və gələcək hədəflər
"Orion" gəmisinin trayektoriyası kifayət qədər dəqiq olduğu üçün aprelin 4-ü və 5-nə planlaşdırılan iki düzəliş manevri ləğv edilib. Bunun əvəzinə, səhər saat 05:03-də 17,5 saniyəlik "OTC-3" manevri uğurla icra olunub. Hazırda heyət dərin kosmosda ilk dəfə sınaqdan keçirilən həyat dəstəyi sistemlərini, əl ilə idarəetmə funksiyalarını və skafandrları yoxlayır.
Təxminən altı saat davam edəcək uçuş zamanı "Orion" Ayın səthinə 6 400 kilometrə qədər yaxınlaşacaq. Astronavtlar həm çılpaq gözlə, həm də göyərtə kameraları vasitəsilə Ayın qütb bölgələrini və görünməyən tərəfinin 20 faizini müşahidə edəcəklər. Toplanan məlumatlar və fotoşəkillər 2028-ci ildə insanların yenidən Ay səthinə enməsini nəzərdə tutan "Artemis-4" missiyası üçün mühüm əhəmiyyət kəsb edir.
