Tədqiqatçılar 100 yaş və daha çox ömür sürən insanların qanında CD4 CTL adlanan nadir sitotoksik T-limfositlərin əhəmiyyətli dərəcədə çox olduğunu aşkar ediblər. Bu xüsusi immun hüceyrələri orqanizmdəki zədələnmiş, infeksiyaya yoluxmuş və potensial xərçəng hüceyrələrini birbaşa məhv etmək qabiliyyətinə malikdir. Mütəxəssislərin fikrincə, immun sisteminin bu cür adaptasiyası insanın müstəsna uzunömürlülüyünə töhfə verən əsas amillərdən biri ola bilər.
Bu hüceyrələr uzunömürlülükdə hansı rolu oynayır?
Yaponiya sakinləri arasında aparılan araşdırmada 70-90 yaş arası şəxslər, 100 yaşdan yuxarı olanlar və 110 yaş həddini keçən super-uzunömürlülər iştirak edib. Müşahidələr göstərib ki, 70-90 yaş qrupunda bu hüceyrələrin payı 4 faiz təşkil etdiyi halda, 100 yaşdan yuxarı şəxslərdə bu göstərici 9,6 faizə, super-uzunömürlülərdə isə 17,6 faizə yüksəlir. Maraqlıdır ki, bu hüceyrələr yaşlılıqda belə funksional tükənmə əlamətləri göstərmədən aktiv fəaliyyətini davam etdirir.
Nə üçün bu kəşf vacibdir?
Analizlər göstərir ki, sözügedən CD4 CTL hüceyrələri CD27 və CD28 zülallarını itirən T-helperlərdən formalaşır və aktiv şəkildə çoxalır. Tədqiqatın müəllifləri qeyd edirlər ki, yaş artdıqca orqanizmdə xərçəng və digər anomaliyaların sayı çoxalır, lakin bu nadir hüceyrələrin artımı immun sisteminin bu təhdidlərə qarşı mübarizə aparmaq üçün uyğunlaşdığını göstərir. "Cell Reports" jurnalında dərc olunan bu elmi iş, uzunömürlülük və immun sistemi arasındakı əlaqəni elmi şəkildə əsaslandırır.
