"Microsoft" şirkəti "Xbox" istifadəçiləri üçün çoxdan gözlənilən yeni sistem yenilənməsini təqdim edib. Əsas yeniliklərdən biri "Xbox Series X / S" konsollarında "Quick Resume" funksiyasının fərdi oyunlar üçün söndürülməsi imkanıdır. Bu funksiya oyunlar arasında sürətli keçid etməyə imkan versə də, daimi internet bağlantısı tələb edən və ya çoxnəfərli (multiplayer) oyunlarda gözlənilməz xətalara səbəb olurdu. Şirkətdən verilən rəsmi açıqlamada bildirilir:
"Uzun müddətli hərəkətsizlikdən sonra və ya onlayn bağlantılara ciddi şəkildə əsaslanan oyunlarda yaranan performans problemləri ilə bağlı rəylərinizi eşitdik."
Cümə axşamı yayımlanan yenilənmə ilə birlikdə istifadəçilər Ana ekranda əvvəlki kimi iki deyil, onadək qrup yarada bilərlər. Bundan əlavə, istifadəçi interfeysində fərdi rənglərin təyini və oyun tarixçəsinin daha asan izlənilməsi mümkündür. Fərdi kompüter (PC) istifadəçiləri üçün də yeniliklər var: artıq qeympaddan siçan kimi istifadə etmək olar. Həmçinin, "Geri qayıt" və "Ən son" siyahılarına üçədək oyun sancmaq mümkündür. "Microsoft" eyni zamanda "Xbox Ally X" portativ cihazında "DLSS" rəqibi olan "Auto SR" texnologiyasını sınaqdan keçirməyə başlayıb.
Qeyd edək ki, yeni "Xbox" rəhbəri Asha Sharma mühəndis qruplarını istifadəçilər tərəfindən ən çox tələb olunan yeniliklər üzərində işləməyə yönəldib. Məhz onun təşəbbüsü ilə "Quick Resume" funksiyasının söndürülməsi və fərdi rənglərin əlavə edilməsi reallaşıb. O, həmçinin "Game Pass" xidmətinin qiymətini aşağı salıb və "Microsoft Gaming" brendindən imtina edərək diqqəti tamamilə "Xbox" markasına cəmləyib.
