"Google" şirkəti uzun müddətdir gözlənilən "Fitbit Edge" fitnes-trakerini rəsmən təqdim edib. Yeni cihaz şirkətin hazırkı geyilə bilən texnologiyalar xəttində "Fitbit Air" və "Google Pixel Watch 5" arasında yer alır. Bu model, smart saatların mürəkkəbliyindən yorulan, lakin bildirişləri izləmək istəyən istifadəçilər üçün nəzərdə tutulub.
"Fitbit Edge" hansı texniki göstəricilərə malikdir?
Yeni cihaz "Fitbit Charge 6" ilə müqayisədə 46 faiz daha böyük OLED ekranla təchiz edilib və 11,5 mm qalınlığa malikdir. Cihazın batareyası bir dəfə doldurulmaqla bir həftəyə qədər işləyə bilir, lakin "always-on" (həmişə aktiv) ekran rejimi aktiv olduqda bu müddət iki günə enir. IP68 standartına uyğun olaraq toz və suya davamlı olan tracker, 5ATM təzyiqinə qədər üzgüçülük üçün yararlıdır.
Sağlamlıq göstəriciləri baxımından "Fitbit Edge" EKG sensoru, dəri temperaturu, SpO2 və optik ürək döyüntüsü sensorları ilə təchiz olunub. Cihazın qiyməti 179,99 ABŞ dolları təşkil edir və bu məbləğə üç aylıq "Google Health Premium" abunəliyi daxildir. Qeyd edək ki, cihazda NFC çipi və mikrofon/dinamik olmadığı üçün təmassız ödənişlər və səsli zənglər dəstəklənmir.
Təkmilləşdirilmiş idman və GPS funksiyaları
Yeni modeldə avtomatik məşq izləmə funksiyası əhəmiyyətli dərəcədə təkmilləşdirilib. "Google"-un bildirdiyinə görə, yenilənmiş hərəkət modeli sayəsində cihaz 100-dən çox idman növünü iki dəfə daha dəqiq izləyə bilir. Bundan əlavə, GPS dəqiqliyi 40 faiz artırılıb və cihaz "turn-by-turn" naviqasiya dəstəyi təqdim edir.
Cihaz "Wear OS" ilə deyil, yenidən işlənmiş "Fitbit OS" ilə işləyir. İstifadəçilər üçün müxtəlif rəng və qayış variantları, o cümlədən metal link və tor tipli kəmərlər təklif olunur. Həmçinin, 219,99 ABŞ dolları dəyərində xüsusi "Stephen Curry" buraxılışı da satışa çıxarılacaq.
