Polşanın paytaxtı Varşavada qeyri-adi mənzərə şahidlərin kameralarına tuş gəlib. 12 aprel tarixində "Unitree G1" markalı, təxminən 1,3 metr boyunda olan və Edvard Varxotski adlandırılan humanoid robot şəhərin avtodayanacağına daxil olmuş çöl donuzlarını qovmağa cəhd edib. Skeytbordda hərəkət edən və qaçan robotun cəhdlərinə baxmayaraq, heyvanlar ona məhəl qoymayaraq ərazidən uzaqlaşıblar. Hadisənin videosu "X" sosial şəbəkəsində
"Mən çöl donuzlarını yenidən meşəyə qovuram"başlığı ilə paylaşılıb.
Mütəxəssislərin sözlərinə görə, bu hadisə sadəcə əyləncə deyil, həm də süni intellektin real insan mühitində sınaqdan keçirilməsidir. "Edvard" layihəsi sahibkar Radoslav Qjelyaçik və süni intellekt tərtibatçısı Bartoş İdzik tərəfindən yaradılıb. Əvvəlcədən yazılmış ssenari ilə işləyən animatorlardan fərqli olaraq, bu robot real vaxt rejimində insanlarla dinamik ünsiyyət qura bilir. O, adaptiv dialoqlar yaratmaq üçün həm xüsusi, həm də mövcud süni intellekt alətlərindən istifadə edir.
"Unitree G1" robotunun texniki göstəriciləri hansılardır?
Tədqiqat məqsədləri üçün hazırlanmış "Unitree G1" çoxməqsədli və yığcam humanoid platformadır. Onun boyu 127 santimetr, çəkisi isə təxminən 35 kiloqramdır. Konfiqurasiyadan asılı olaraq, robot aşağıdakı özəlliklərə malikdir:
- Oynaqlarda 23-dən 43-ə qədər servomühərrik;
- Maksimal fırlanma anı: 120 nyuton-metr;
- 3D-lidar və "Intel RealSense" dərinlik kamerası;
- Səsli idarəetmə üçün səs-küyü boğan mikrofonlar.
Qurğu 9000 mAs tutumlu dəyişdirilə bilən batareya ilə təchiz edilib ki, bu da iki saata qədər fasiləsiz işləməyi təmin edir.
Robotun hərəkət və koordinasiyası səkkiznüvəli prosessor vasitəsilə idarə olunur. Bu sistem ona saniyədə 2 metr (saatda təxminən 7,2 kilometr) sürətlə hərəkət etməyə imkan verir. Cihaz "Unitree" şirkətinin xüsusi "UnifoLM" modeli əsasında fəaliyyət göstərir. 2024-cü ilin mayında təqdim edilən bu modelin başlanğıc qiyməti 99 min Çin yuanı təşkil edir və qlobal tədqiqatlarda geniş istifadə olunur.
Süni intellektin ekstremal sınaqları necə keçirilib?
Bu humanoid robot təkcə şəhər mühitində deyil, həm də sərt iqlim şəraitində öz imkanlarını sübut edib. Bu yaxınlarda "Unitree G1" Çinin Sintszyan bölgəsindəki Altay dağlarının qarlı çöllərində avtonom yürüş həyata keçirib. Qurğu -47,4 °C temperaturda 130 mindən çox addım ataraq buz üzərində Qış Olimpiya Oyunlarının emblemini cızıb.
