Strateji və Beynəlxalq Araşdırmalar Mərkəzi (CSIS) tərəfindən peyk görüntüləri və açıq mənbələr əsasında aparılan təhlillər Çinin ilk atom aviadaşıyıcısı olan Type 004-ün inşasında ciddi irəliləyiş olduğunu göstərir. 2026-cı ilin may ayına aid görüntülərdə gəminin uzunluğunun 286 metr, eninin isə 46 metr olduğu müəyyən edilib.
Ekspertlər bildirirlər ki, gəmi hazırkı vəziyyəti ilə Çinin “Fujian” aviadaşıyıcısından daha böyük görünür və tamamlandıqdan sonra ABŞ-ın “Gerald R. Ford” sinfi super aviadaşıyıcıları ilə ölçü baxımından rəqabət apara bilər. Gəminin gövdəsindəki iki böyük bölmə onun nüvə reaktorları ilə təchiz olunacağına dair əsas sübut hesab edilir.
Texniki imkanlar və strateji hədəflər:
- Təkmilləşdirilmiş uçuş sistemi: Gəminin dörd elektromaqnit katapultla təchiz ediləcəyi gözlənilir ki, bu da daha çox təyyarənin havaya qalxmasına imkan verəcək.
- Müdafiə sistemi: Aviadaşıyıcı qrupları üçqatlı müdafiə sistemi (J-15 qırıcıları, 052D və 054A sinfi gəmilər) və DF-21D, DF-26B kimi “aviadaşıyıcı qatili” adlandırılan raketlərlə qorunacaq.
- Qlobal ambisiyalar: Hərbi analitik Erik Verthaymın qiymətləndirməsinə görə, tikinti tempi qorunarsa, gəmi 2032-ci il ətrafında suya buraxıla bilər.
Çin həmçinin logistik imkanlarını artırmaq üçün 271 metr uzunluğunda dünyanın ən böyük hərbi təchizat gəmisini inşa edir. Mütəxəssislər qeyd edirlər ki, Çin hərbi donanması pilot çatışmazlığı və təcrübə kimi çətinliklərlə üzləşsə də, Type 004 layihəsi Pekinin qlobal dəniz gücü olmaq yolunda atdığı qətiyyətli addımdır.
