İnternet təhlükəsizliyinin təməl daşlarından biri olan "RSA" sistemində tədqiqatçılar tərəfindən yeni bir boşluq müəyyən edilib. Mütəxəssislər sübut ediblər ki, rəqəmsal imzaları saxtalaşdırmaq üçün həmişə gizli açarı bərpa etmək və ya böyük ədədləri vuruqlara ayırmaq tələb olunmur. Bu yanaşma "RSA"-nın təhlükəsizlik prinsiplərinə dair ənənəvi təsəvvürləri dəyişdirir.
Bu boşluq necə işləyir?
Yeni metod "xüsusi ədəd sahəsi ələyi" (number field sieve) alqoritminin bir növünə və kor imza protokollarında istifadə olunan xüsusi mexanizmlərə əsaslanır. Hücumçu çoxlu sayda sorğu göndərməklə və nəticələri təhlil etməklə etibarlı imza yaratmaq üçün kifayət qədər məlumat toplaya bilir. Maraqlıdır ki, bu proses üçün süni intellekt və ya qrafik prosessorların gücündən istifadə edilməyib, lakin gələcəkdə bu texnologiyalar hücumun səmərəliliyini artıra bilər.
Hansı sistemlər risk altındadır?
Tədqiqatın nəticələri xüsusilə 1024-bitlik açarlar üçün təhlükəlidir, lakin 2048 və 4096-bitlik açarların da kor imza mexanizmlərində istifadə edildikdə etibarlılığını azaldır. Bu boşluq məlumatın məzmununu bilmədən imzalanmasına icazə verən sistemlərə, məsələn, "Apple" və "Cloudflare" tərəfindən tətbiq olunan "Privacy Pass" protokoluna təsir edə bilər. Mütəxəssislər qeyd edir ki, açarların mütəmadi olaraq yenilənməsi riski qismən azaldır, lakin problemi tamamilə aradan qaldırmır.
