Tim Cook, "Apple" şirkətinin baş direktoru vəzifəsindən getdiyini elan edib. 1 sentyabr 2026-cı il tarixindən etibarən bu vəzifəni hazırda aparat təminatı mühəndisliyi üzrə baş vitse-prezident olan John Ternus icra edəcək. Məlumata görə, Tim Cook yay ayları ərzində keçid prosesinin rəvan keçməsi üçün yeni rəhbərlə sıx əməkdaşlıq edəcək. Daha sonra isə o, "Apple" idarə heyətinin icraçı sədri kimi fəaliyyətini davam etdirəcək və qlobal siyasətçilərlə əlaqələr kimi məsələlərə dəstək verəcək.
"Apple"ın yeni rəhbəri kimdir?
Tim Cook yeni rəhbər barədə danışarkən onun mühəndis zəkasına və yenilikçi ruha sahib olduğunu vurğulayıb. O, John Ternusun 25 illik fəaliyyəti ərzində şirkətə saysız-hesabsız töhfələr verdiyini bildirib.
"O, "Apple"ı gələcəyə aparacaq ən doğru şəxsdir. Onun bacarıqlarına və xarakterinə inamım tamdır",- deyə Tim Cook əlavə edib.
Öz növbəsində John Ternus həm Steve Jobs, həm də Tim Cook ilə işləmək şansına sahib olduğu üçün özünü şanslı adlandırıb. O, şirkətin missiyasını irəli aparmaqdan qürur duyduğunu və gələcək illərdə əldə edəcəkləri nailiyyətlərə nikbin yanaşdığını qeyd edib. Məlumata görə, yeni baş direktor 1 sentyabr tarixində şirkətin direktorlar şurasına da qatılacaq.
Rəhbərlikdə başqa hansı dəyişikliklər baş verib?
Baş direktor dəyişikliyi ilə yanaşı, "Apple" rəhbərliyində digər təyinatlar da reallaşıb. Belə ki, şirkətin aparat texnologiyaları üzrə sabiq baş vitse-prezidenti Johny Srouji dərhal qüvvəyə minmək şərtilə baş aparat təminatı direktoru təyin edilib. O, həm özünün əvvəlki şöbəsinə, həm də John Ternusun rəhbərlik etdiyi aparat təminatı mühəndisliyi bölməsinə nəzarət edəcək.
Tim Cookun idarəçilik dövrü necə yadda qaldı?
Xatırladaq ki, Tim Cook "Apple" şirkətinə 1998-ci ildə qoşulub və 2011-ci ildə Steve Jobsdan baş direktor postunu təhvil alıb. Onun rəhbərliyi dövründə şirkət "Apple Watch", "AirPods", "Apple Vision Pro", "iCloud" və "Apple Pay" kimi inqilabi məhsullarını təqdim edib. Bundan əlavə, Tim Cook xidmətlər sektorunun böyüməsinə xüsusi diqqət yetirib. Şirkətin məlumatına görə, hazırda bu sektor 100 milyard ABŞ dollarından çox dəyəri olan nəhəng bir biznesə çevrilib.
