"Subnautica 2" sualtı sağ qalma simulyatorunun erkən giriş (early access) mərhələsinə uğurlu start verməsi, onun məşhur sələfi olan orijinal "Subnautica" oyununa olan marağı da artırıb. Reddit istifadəçilərinin müşahidələrinə görə, keçən həftəsonu orijinal oyun Steam platformasında özünün pik onlayn oyunçu rekordunu yeniləyib.
Belə ki, mayın 24-də oyunda eyni anda 51 446 nəfər qeydə alınıb. 2018-ci ilin yanvarında erkən girişdən çıxan oyunun əvvəlki rekordu 51 156 nəfər təşkil edirdi. Beləliklə, oyun səkkiz ildən çox müddət sonra öz şəxsi rekordunu yeniləməyi bacarıb.
Orijinal oyuna olan bu marağın "Subnautica 2"-nin təsiri ilə yarandığı qeyd edilir. Xatırladaq ki, "Subnautica 2" mayın 14-də PC, Xbox Series X/S platformalarında və Game Pass xidmətində istifadəyə verilib. Oyunun buraxılışından cəmi beş gün sonra dünya üzrə satışları 4 milyon nüsxəni keçib.
"Subnautica 2"-nin Steam-dəki pik onlayn göstəricisi isə orijinal oyunu xeyli geridə qoyub: oyunun erkən giriş mərhələsinin başlanğıcında 467,5 mindən çox istifadəçi qeydə alınıb. Hazırda dörd oyunçu üçün kooperativ rejimi, bir neçə biom və müxtəlif canlıları özündə birləşdirən "Subnautica 2"-nin tam versiyasının 2-3 il ərzində buraxılması gözlənilir.
