Fitnes izləmə platforması Strava, süni intellekt (AI) vasitəsilə məlumatların ələ keçirilməsi (scraping) ilə mübarizə aparmaq məqsədilə API girişinə məhdudiyyətlər tətbiq edib. Yeni qaydalara əsasən, Strava-nın məlumatlarından istifadə edərək tətbiq hazırlamaq istəyən tərtibatçılar ayda 11,99 dollar abunə haqqı ödəməlidirlər.
Şirkət özünün tərtibatçı mərkəzində bu dəyişikliyin səbəbini "zero-code" (kodsuz) süni intellekt alətləri ilə əlaqələndirib. Strava bildirib ki, bu alətlər istifadəçilərə API-lərə həddindən artıq yük düşməsinə səbəb olan tətbiqləri sürətlə yaratmağa imkan verir. Şirkətin məlumatına görə, ilin əvvəlindən bəri tərtibatçı müraciətləri 448% artıb, API vasitəçiləri qaydaları pozub və məlumatların kütləvi toplanması platformanın performansına mənfi təsir göstərib.
Dəyişikliyə qədər tərtibatçılar Strava API-dən pulsuz istifadə edə bilirdilər. Qeyd edək ki, Strava 2024-cü ildə də üçüncü tərəf tətbiqlərinin göstərə biləcəyi məlumatları məhdudlaşdırmışdı. Şirkət rəsmiləri vurğulayır ki, yeni API məhdudiyyətləri geyilə bilən cihazların inteqrasiyasına və istifadəçilərin öz məlumatlarını pulsuz yükləmə imkanına təsir göstərməyəcək.
