Starship-in on ikinci sınaq uçuşu Moskva vaxtı ilə saat 01:30-da baş tutub. Startdan 40 saniyə əvvəl qısa fasilə verilsə də, uçuş uğurla həyata keçirilib. Super Heavy daşıyıcı raketinin 33 Raptor mühərriki normal işə düşüb və raket əvvəlki versiyadan daha sürətlə yüksəlib.
Uçuş zamanı bir sıra texniki problemlər yaşanıb:
- Uçuşun birinci dəqiqəsindən sonra Super Heavy-nin xarici halqasındakı mühərriklərdən biri sıradan çıxıb.
- Birinci pillənin geri qayıtma manevri zamanı mühərrik zədələnib və bu, raketin idarəetməsində çətinlik yaradıb. Nəticədə, raket 6 dəqiqə 20 saniyə sonra Meksika körfəzinə düşüb.
- İkinci pillə olan Ship gəmisində də vakuum üçün nəzərdə tutulmuş Raptor mühərriklərindən biri sönüb, lakin gəmi planlaşdırılan trayektoriya üzrə hərəkətini davam etdirib.
Uçuşun digər mərhələlərində isə müsbət nəticələr əldə olunub. Kosmosda 20 ədəd Starlink V3 peyk simulyatoru buraxılıb və iki real peyk vasitəsilə gəminin görüntüləri çəkilib. Atmosferə giriş və eniş mərhələsi uğurla icra edilsə də, okeana düşdükdən sonra gəmi partlayıb. Mütəxəssislər Raptor mühərriklərində təkmilləşdirmələrin aparılacağını və növbəti uçuşun iyunun sonu və ya iyul ayında baş tuta biləcəyini bildirirlər.
