İllərdir ki, mühəndislər stolüstü tennis oynaya bilən müxtəlif maşınlar hazırlayırlar. Buna misal olaraq, CES 2017 sərgisində nümayiş olunan "Omron" şirkətinin FOREPHUS aparatını göstərmək olar. Lakin "Sony" şirkətinin süni intellekt bölməsi tərəfindən inkişaf etdirilən "Ace" robotu bu sahədə əsl inqilab edib. Süni intellekt şahmat kimi stolüstü oyunlarda insanları asanlıqla üstələsə də, fiziki idman növləri daha böyük çətinliklər yaradır. Buna baxmayaraq, yeni robot Beynəlxalq Stolüstü Tennis Federasiyasının (ITTF) rəsmi qaydaları çərçivəsində yüksək reytinqli insan rəqiblərlə başa-baş mübarizə apara və onlara qalib gələ bilən ilk sistem kimi tarixə düşüb.
Stolüstü tennis yüksək sürətlə hərəkət edən və fırlanaraq trayektoriyasını dəyişən topa görə xüsusilə mürəkkəb oyun hesab edilir. Bu çətinliyin öhdəsindən gəlmək üçün "Sony" tədqiqatçıları səkkiz oynaqdan ibarət xüsusi robotik sistem ərsəyə gətiriblər. Bu oynaqlardan ikisi raketkanın mövqeyini, ikisi ümumi istiqaməti tənzimləyir, digər üçü isə robota güclü zərbələr endirməyə imkan verir. "Ace" robotunun hərəkət edən hissələri mürəkkəb görmə sistemi ilə dəstəklənir. Meydançanı əhatə edən doqquz ənənəvi kamera topun 3D məkanındakı yerini müəyyənləşdirir, üç "baxışa nəzarət sistemi" isə topun bucaq sürətini və fırlanmasını ölçərək trayektoriyanı dəqiqliklə hesablayır.
"Nature" jurnalında dərc olunan və robotun imkanlarını vurğulayan araşdırmaya görə, 2025-ci ilin aprel ayında keçirilən sınaq matçlarında "Ace" elit oyunçulara (10 ildən çox təcrübəsi olan idmançılara) qarşı beş matçdan üçündə qələbə qazanıb, peşəkar liqalarda çıxış edən oyunçulara isə iki dəfə məğlub olub. "Reuters" agentliyinin məlumatına əsasən, "Sony" bildirir ki, robot 2025-ci ilin dekabrında və ötən ay peşəkar tennisçiləri də məğlub etməyi bacarıb.
