"Google" şirkəti "Gemini" süni intellekt platformasının imkanlarını genişləndirərək, istifadəçilərə sənədlərlə işləmək üçün yeni funksiyalar təqdim edib. Artıq "Google Docs", "Google Sheets", "PDF", "Markdown", "TXT" faylları və proqramlaşdırma kodları birbaşa çat interfeysində yaradıla, önizlənə və redaktə edilə bilir. Bu yenilik istifadəçilərin iş prosesini sürətləndirmək və platformalar arası keçid ehtiyacını azaltmaq məqsədi daşıyır.
Yeni funksionallıq bu gündən etibarən bütün "Gemini" istifadəçiləri üçün əlçatandır. "PDF" fayllarının önizlənməsi və redaktəsi həm veb, həm də mobil versiyalarda dəstəklənsə də, digər fayl formatları hazırda yalnız veb versiyada mövcuddur. İstifadəçilər sənədləri tam ekran rejimində genişləndirə və mətnin müəyyən hissələrini seçərək "Gemini"-yə konkret dəyişikliklər etməyi tapşıra bilərlər. Məsələn, cədvəl formatındakı məlumatları seçərək onları qrafikə çevirmək mümkündür.
Xatırladaq ki, "Google" bu ilin əvvəlində "Gemini"-də faylların yaradılması və yüklənməsi dəstəyini təqdim etmişdi, lakin yeni yeniləmə birbaşa redaktə imkanı ilə bu prosesi daha interaktiv edir. Şirkət daha əvvəl "Google Workspace" tətbiqlərində "Gemini" inteqrasiyasını təmin etmişdi. Rəqabət mühitində "Anthropic" şirkəti də oxşar funksiyanı "Claude" çat-botu üçün istifadəyə vermişdi.
