"The San Francisco Standard" nəşrinin məlumatına görə, bazar günü səhər saatlarında Sam Altmanın Russian Hill ərazisində yerləşən evinə atəş açılıb. Müşahidə kameralarının qeydlərinə əsasən, avtomobildə olan sərnişin iqamətgaha doğru silahdan atəş açıb. Hadisə ilə bağlı polis tərəfindən iki şübhəli şəxs saxlanılıb və onlara qarşı səhlənkarlıqla silahdan istifadə ittihamı irəli sürülüb.
Bu hadisə, cümə günü eyni ünvana Molotov kokteyli atan 20 yaşlı gəncin həbsindən qısa müddət sonra baş verib. San-Fransisko Polisi (SFPD) 12 aprel tarixində Sakit okean vaxtı ilə saat 02:56-da ehtimal edilən atəş səsləri ilə bağlı əraziyə cəlb edilib. Hər iki insidentlə bağlı istintaq tədbirləri davam etdirilir.
Hüquq-mühafizə orqanları qaçan avtomobilin dövlət nömrə nişanını kamera vasitəsilə təsbit ediblər. Əməliyyat nəticəsində 25 və 23 yaşlı iki şübhəli şəxs saxlanılıb. Onların qaldığı evdə aparılan axtarış zamanı üç ədəd odlu silah aşkar edilərək müsadirə olunub.
San-Fransisko polis rəisi Derrick Lew hadisə ilə bağlı rəsmi açıqlama verib:
"SFPD silahla bağlı cinayətlərə son dərəcə ciddi yanaşır və bu cür əməlləri törədən hər kəs qanunun bütün sərtliyi ilə həbs edilib mühakimə olunacaq. Şübhəliləri müəyyənləşdirən, onları nəzarətə götürən və təhlükəli silahları küçələrimizdən yığışdıran zabitlərimizə çevik hərəkətlərinə görə təşəkkür etmək istəyirəm."
