Rusiya Rəqəmsal İnkişaf Nazirliyinin məlumatına görə, MTS, "Beeline", "MegaFon" və T2 operatorları tərəfindən 5G texnologiyası artıq 16 şəhərdə aktivləşdirilib. Bu yenilik təxminən 10 milyon nəfərə yüksəksürətli mobil internetə çıxış imkanı yaradır. İlkin mərhələdə şəbəkə daha əvvəl LTE üçün ayrılmış tezliklər üzərində qurulub ki, bu da şəbəkə tutumunu 20–25% artırmağa imkan verir.
5G şəbəkəsi hansı şəhərlərdə mövcuddur?
Moskva, Sankt-Peterburq və Yekaterinburq şəhərlərində "böyük dördlük" operatorlarının hamısı 5G xidmətlərini təqdim edir. Digər bölgələrdə isə operatorlar arasında bölgü aparılıb: Novosibirsk və Kazanda "MegaFon" və MTS, Samarada "Beeline" və "MegaFon", Veliki Novqorod, Krasnodar, Nijni Novqorod və Tver şəhərlərində isə yalnız "MegaFon" xidmət göstərir. Nazir rəhbəri Maksut Şadayev bildirib ki, ilin sonuna qədər daha 50 şəhərdə 5G-nin tətbiqi planlaşdırılır.
Niyə "iPhone" istifadəçiləri 5G-yə qoşula bilmir?
Hazırda 5G şəbəkəsindən yalnız "Android" platformalı cihaz sahibləri istifadə edə bilər. "Apple" şirkətinin rusiyalı operatorlar üçün xüsusi proqram təminatı və operator parametrlərini (carrier profile) aktivləşdirməməsi "iPhone" istifadəçiləri üçün əsas maneədir. Bundan əlavə, Rusiyadakı 5G şəbəkələrinin dünyada geniş yayılan n78 diapazonu əvəzinə, əsasən n79 diapazonunda qurulması texniki uyğunluq məsələlərini gündəmə gətirir.
Bu texnologiya hansı sahələrdə istifadə olunacaq?
5G şəbəkələrinin tətbiqi təkcə internet sürətini artırmaqla məhdudlaşmır. Bu texnologiya sənaye müəssisələrinin rəqəmsallaşdırılması, pilotsuz nəqliyyat vasitələrinin idarə olunması, teletibb və "ağıllı şəhər" sistemlərinin inkişafı üçün vacibdir. Həmçinin, 4,63–4,99 GHz diapazonunda yeni tezlik zolaqlarının operatorlara pulsuz verilməsi rəqabəti qorumaq və tarifləri əlçatan saxlamaq məqsədi daşıyır.
