Tayvanın "ProLogium" şirkəti 3,5 nəsil bərk cisimli litium-keramika batareyalarının (LCB) seriyalı istehsalına rəsmən start verib. TÜV tərəfindən aparılan müstəqil sınaqlar nəticəsində 185,4 A·saat tutumlu elementin 381 Vt·saat/kq xüsusi enerji sıxlığına və 903 Vt·saat/l həcmi sıxlığına malik olduğu təsdiqlənib. Bu göstəricilər batareyanın əvvəlki modellərlə müqayisədə daha yüngül və kompakt olduğunu, eyni zamanda yüksək enerji ötürmə qabiliyyətini qoruyub saxladığını sübut edir.
Bu texnologiya necə işləyir?
Batareyalar şirkətin patentləşdirilmiş "Logithium" arxitekturası əsasında hazırlanıb. Elektrodlar arasında yerləşən xüsusi keramika separatoru və kənarlardakı qoruyucu çərçivə mexaniki zədələnmələrin qarşısını alır və etibarlı izolyasiyanı təmin edir. UL Solutions tərəfindən keçirilən sınaqlarda batareya 120 °C temperaturda vakuum altında cəmi 0,05% kütlə itkisi göstərib ki, bu da beynəlxalq standartlara görə "tam bərk cisimli" təsnifatı üçün tələb olunan 0,5%-lik limitdən 10 dəfə aşağıdır.
Gələcək planlar və tətbiq sahələri
"ProLogium" artıq dördüncü nəsil batareyalar üzərində işləyir və bu modellərdə üzvi materiallardan tamamilə imtina edilməsi planlaşdırılır. Yeni nəsil batareyalar ASM (qısaqapanmadan müdafiə mexanizmi) ilə təchiz ediləcək və aşağı temperaturlarda daha effektiv işləyəcək. Şirkət bu texnologiyanı təkcə elektrik avtomobillərində deyil, həm də süni intellekt mərkəzlərində, aviasiya və dəniz nəqliyyatı sahələrində tətbiq etməyi hədəfləyir. İstehsalın miqyasını genişləndirmək üçün Fransa və Şimali Amerikada yeni müəssisələrin yaradılması nəzərdə tutulur.
