Süni intellektlə işləyən dizayn platforması olan "Picsart" məzmun yaradıcıları üçün yeni monetizasiya proqramını istifadəyə verir. Şirkətin məlumatına görə, bu təşəbbüs heç bir dəvət siyahısı və ya minimum izləyici sayı tələb etmədən hər kəs üçün açıqdır. İştirakçılar xüsusi kampaniyalar üçün "Picsart" alətləri vasitəsilə orijinal məzmun hazırlayaraq, onları öz sosial media hesablarında paylaşacaq və izləyici reaksiyalarına əsasən gəlir əldə edəcəklər.
Sistem necə işləyir?
Proqrama qoşulan istifadəçilər iştirak edə biləcəkləri mövcud tapşırıqları və yaradıcılıq çağırışlarını göstərən xüsusi idarəetmə panelinə giriş əldə edirlər. Məsələn, kampaniyalardan biri platformanın mətn və ya səsli əmrlərlə şəkil və video yarada bilən süni intellekt köməkçisi "Picsart Aura" vasitəsilə sevimli heyvanların yaradılmasını tələb edə bilər. Şirkət xəbərdarlıq edir ki, heç bir yaradıcı səy göstərmədən sadəcə süni intellektlə şəkillər yaradıb paylaşmaq istifadəçilərə yüksək gəlir gətirməyəcək.
Məzmun hazırlandıqdan sonra yaradıcılar qısa bir forma dolduraraq sosial şəbəkədəki paylaşımın linkini əlavə edir, kampaniya tələblərinə uyğun etiketləyir və prosesi qısaca təsvir edirlər. Hazırlanmış materiallar birbaşa istifadəçinin "Instagram", "TikTok", "YouTube" və "X" hesablarında paylaşılır. Qazanılan məbləğ baxış, rəy, paylaşım və əhatə dairəsinə əsasən hesablanır. İstifadəçilər gəlirlərini paneldən izləyə və "Stripe" vasitəsilə çıxara bilərlər.
Şirkətin gələcək hədəfləri nələrdir?
"Picsart" şirkətinin qurucusu və icraçı direktoru Hovhannes Avoyan bildirib ki, yaradıcılıq iqtisadiyyatında platformaların sıravi istifadəçiləri mükafatlandırmaması kimi struktur problemi mövcuddur. O, yeni proqramın bu problemi həll etməyə yönəldiyini vurğulayıb. Qeyd edək ki, 2011-ci ildə qurulan və dünya üzrə 130 milyondan çox istifadəçisi olan platforma, 2021-ci ildə "unicorn" statusuna çatıb.
Monetizasiya proqramının genişləndirilməsi, şirkətin süni intellekt agentləri bazarını istifadəyə verməsindən bir neçə həftə sonraya təsadüf edir. Həmin yenilik sayəsində istifadəçilər sosial media məzmunlarını redaktə etmək və ya "Shopify" üzərindəki məhsul şəkillərini yeniləmək kimi müxtəlif tapşırıqlar üçün süni intellekt köməkçilərini "işə götürə" bilirlər. Bu addımlar platformanın sadəcə bir dizayn alətindən gəlir mənbəyinə çevrilməsi strategiyasının tərkib hissəsidir.
