Texnologiya dünyasında 'RAMageddon' kimi tanınan yaddaş komponentlərinin qiymət artımı 'Nothing' şirkətinin planlarına ciddi təsir göstərib. Şirkətin həmtəsisçisi Akis Evangelidis, 'X' sosial şəbəkəsindəki paylaşımında 'CMF Phone 2 Pro' modelinin davamçısının bu il bazara çıxarılmayacağını rəsmən təsdiqləyib. O, mövcud yaddaş qiymətləri ilə istifadəçilərə münasib qiymətə keyfiyyətli bir irəliləyiş təqdim etməyin mümkün olmadığını vurğulayıb.
Şirkətin digər həmtəsisçisi və CEO-su Carl Pei isə vəziyyətin ciddiliyini rəqəmlərlə izah edib. Onun sözlərinə görə, 'Phone 4A' modelinin istehsal qərarı verildiyi vaxtdan bəri yaddaş xərcləri iki dəfə artıb və bu artım tendensiyası davam edir. Carl Pei hazırda yaddaşın smartfon istehsalında ən bahalı komponentə çevrildiyini qeyd edib.
Bu problem təkcə 'Nothing' şirkəti üçün xarakterik deyil. 'Apple' şirkətinin rəhbəri Tim Cook da oxşar çətinliklərlə üzləşdiklərini və yaddaş qiymətlərinin qeyri-dayanıqlı səviyyəyə çatdığını bildirərək, qiymət artımlarının qaçılmaz olduğunu işarə edib. Buna baxmayaraq, 'Nothing' bu il yeni məhsullar və hətta tamamilə yeni kateqoriyalar üzərində işləməyə davam edəcəyini açıqlayıb.
