"Bloomberg" nəşrinin məlumatına görə, ABŞ-ın Maliyyə naziri Scott Bessent və Federal Ehtiyatlar Sisteminin sədri Jerome Powell bu həftə bank rəhbərləri ilə görüş keçirib. Rəsmilər rəhbərləri kibertəhlükəsizlik boşluqlarını aşkarlamaq üçün "Anthropic" şirkətinin yeni "Mythos" modelindən istifadə etməyə təşviq ediblər.
İlkin mərhələdə modelə giriş əldə edən yeganə tərəfdaş təşkilat "JPMorgan Chase" olsa da, hazırda digər nəhəng maliyyə qurumları da prosesə qoşulub. Bildirilir ki, "Goldman Sachs", "Citigroup", "Bank of America" və "Morgan Stanley" kimi aparıcı banklar da "Mythos" modelini sınaqdan keçirir.
"Anthropic" bu həftə təqdim etdiyi yeni modelinə çıxışı hələlik məhdudlaşdırdığını açıqlayıb. Şirkət bunu "Mythos" modelinin xüsusi olaraq kibertəhlükəsizlik üçün öyrədilməməsinə baxmayaraq, təhlükəsizlik zəifliklərini tapmaqda həddindən artıq bacarıqlı olması ilə əsaslandırıb. Bəzi ekspertlər isə bunun sadəcə bir reklam gedişi və ya ağıllı korporativ satış strategiyası olduğunu iddia edirlər.
Bu xəbər "Anthropic" ilə Tramp administrasiyası arasındakı mövcud gərginlik fonunda xüsusilə təəccüblüdür. Belə ki, Müdafiə Nazirliyi süni intellekt modellərinin hökumət tərəfindən istifadəsini məhdudlaşdırmaq cəhdləri ilə bağlı danışıqlar uğursuz olduqdan sonra şirkəti təchizat zənciri riski elan edib və hazırda tərəflər məhkəmədə üz-üzədir. Eyni zamanda, "Financial Times"ın məlumatına görə, Böyük Britaniyanın maliyyə tənzimləyiciləri də "Mythos" tərəfindən yaradıla biləcək riskləri müzakirə edirlər.
