Microsoft şirkəti Build tərtibatçı konfransında Windows-u proqram təminatının hazırlanması üçün daha etibarlı platformaya çevirmək niyyətində olduğunu bəyan edib. Windows 11-in performans və etibarlılıq göstəricilərini təkmilləşdirən şirkət, eyni zamanda tərtibatçılara bir çox faydalı alət və tətbiqləri özündə birləşdirən yeni mühit təqdim edir.
Windows-un rəhbəri Pavan Davulurinin sözlərinə görə, platformaya tez-tez istifadə olunan əmr sətri utilitləri, rahat shell mühiti, sürətli quraşdırma imkanı və Linux konteynerləri ilə işləmək üçün daxili vasitələr əlavə edilib. Həmçinin, eksperimental Intelligent Terminal funksiyası təqdim olunub.
Əsas yeniliklərdən biri Coreutils for Windows-dur. Bu, Rust dilində yazılmış və Windows-da yerli olaraq işləyən Linux tipli əmr sətri alətləridir. Bu yenilik sayəsində tərtibatçılar Linux, macOS və ya bulud mühitlərində istifadə etdikləri iş axınlarını Windows-da da rahatlıqla tətbiq edə biləcəklər.
Bundan əlavə, Microsoft WSL (Windows Subsystem for Linux) konteynerlərini təqdim edir. Bu funksiya Windows daxilində Linux konteynerlərini yaratmağa və idarə etməyə imkan verir. Yaxın aylarda ictimai sınaq versiyası istifadəyə veriləcək bu alət, həmçinin yerli Windows tətbiqləri daxilində də Linux konteynerlərini işlətməyə şərait yaradır.
Yeniliklər sırasında Windows Developer Configurations-un ümumi istifadəyə verilməsi də yer alır. Bu alət yeni cihazların tərtibatçı ehtiyaclarına uyğun olaraq (WSL, PowerShell 7, Visual Studio Code və Git kimi alətlərlə) avtomatik konfiqurasiya edilməsini təmin edir.
