"Meta" şirkətinin baş direktoru Mark Zukerberq istifadəçi yazışmalarının serverlərdə saxlanılmadığı ilk böyük süni intellekt məhsulu olan "Incognito Chat" rejimini elan edib. Bu yeni funksiya mesajları yaddaşda saxlamır və digər çatbotlardan fərqli olaraq ucdan-uca şifrələmə texnologiyasından istifadə edir. Qeyd edək ki, şirkət bu yaxınlarda analoji şifrələməni "Instagram" birbaşa mesajlarından (DM) yığışdırmışdı.
Bu texnologiya necə işləyir?
Yeni məxfilik funksiyası ötən il "WhatsApp" daxilində məlumatların təhlükəsiz emalı üçün istifadəyə verilmiş xüsusi texnologiya əsasında qurulub.
"Digər tətbiqlər də gizli rejimlər təqdim edib, lakin onlar hələ də daxil olan sualları və verilən cavabları görə bilirlər. "Meta AI" ilə "Incognito Chat" tamamilə məxfidir, yəni heç kim — hətta "Meta" belə — sizin yazışmalarınızı oxuya bilməz,"— deyə Mark Zukerberq vurğulayıb.
Rəqiblərdə vəziyyət necədir?
Digər texnologiya nəhəngləri istifadəçi məlumatlarını müəyyən müddət ərzində öz serverlərində saxlamağa davam edirlər. Məsələn, "Google" özünün "Gemini" modelindəki müvəqqəti çat məlumatlarını 72 saata qədər yaddaşda saxlayır. "ChatGPT" və "Claude" isə gizli yazışmaları ən azı 30 gün müddətində qoruyur. "Anthropic" və "OpenAI" şirkətləri bu fərqliliklərlə bağlı hələlik rəsmi şərh verməyiblər.
Hansı risklər var?
Süni intellekt yazışmalarının saxlanılması son vaxtlar ciddi hüquqi problemlərə və məhkəmə çəkişmələrinə səbəb olub. Kanadanın Tumbler Ridge qəsəbəsində və Florida Ştat Universitetində baş vermiş kütləvi atışmalarla bağlı məhkəmə işlərində "ChatGPT" qeydləri əsas sübut kimi çıxış edir. Həmçinin, "New York Times" tərəfindən qaldırılan iddiada danışıqların qeyri-müəyyən müddətə saxlanılması barədə məhkəmə qərarı yer alıb.
Nə üçün bu vacibdir?
Məlumatların məxfiliyi istifadəçilərin təhlükəsizliyi üçün həlledici amilə çevrilir. Belə ki, "Google" şirkəti "Gemini" tərəfindən verilən tapşırıqlar nəticəsində həyatını itirdiyi iddia edilən 36 yaşlı kişinin ailəsi tərəfindən məhkəməyə verilib. "Meta" nümayəndələrinin sözlərinə görə, tam məxfi olan yeni "Incognito Chat" xidməti yaxın aylarda həm "WhatsApp", həm də "Meta AI" tətbiqlərində istifadəçilərin ixtiyarına veriləcək.
