Müstəqil yapon tərtibatçısı lemorion_1224 və onun həmkarı Haganeiro tərəfindən hazırlanan "Meccha Chameleon" oyunu qlobal oyun bazarında fenomenal nəticə göstərib. Cəmi iki ay ərzində ərsəyə gələn bu virtual gizlənqaç simulyatoru, rəsmi satışa çıxarıldıqdan cəmi 25 gün sonra 15 milyon nüsxəlik satış həcminə çatıb.
Oyunun uğuru ilk günlərdən özünü büruzə verib: layihə dörd gün ərzində 1 milyon, doqquz gün ərzində isə 5 milyon nüsxə satılaraq rekordları yeniləyib. lemorion_1224 sosial şəbəkə hesabında fanatlara təşəkkür edərək, yaxın bir həftə ərzində məşhur bir yapon ulduzu ilə yeni əməkdaşlığın anons ediləcəyini bildirib.
Bu oyun niyə bu qədər populyardır?
Niko Partners şirkətinin analitiki Daniel Ahmad-ın qeydlərinə görə, "Meccha Chameleon" hazırda 2026-cı ilin ən sürətli və ən uğurlu satış göstəricisinə malik oyunudur. İki nəfərlik kiçik komanda tərəfindən yaradılan bu layihə "Slay the Spire 2", "Subnautica 2", "Resident Evil Requiem", "Crimson Desert" və "Forza Horizon 6" kimi nəhəng studiyaların oyunlarını geridə qoymağı bacarıb.
10 iyun tarixində "Steam" platformasında istifadəyə verilən oyun, istifadəçilər tərəfindən 86% reytinqlə "çox müsbət" rəylər alıb. Oyunçulara xarakterlərini ətraf mühitlə tamamilə birləşdirərək gizlənmək imkanı verən bu unikal mexanika, layihənin qısa müddətdə geniş kütlələrə çatmasında əsas rol oynayıb.
