Şəbəkə memarı Ceyms Teyn (James Thain) "IPv8" protokolunun layihəsini irəli sürüb. Yeni texnologiya "IPv6" standartına alternativ kimi deyil, ənənəvi "IPv4" sisteminin geriyə uyğunluq qorunmaqla genişləndirilməsi kimi nəzərdə tutulub. Müəllif öz ideyasının işləkliyini sübut edəcək sınaq platformasının yaradılması məqsədilə vəsait toplamağa başlayıb.
"IPv8" protokolu necə işləyir?
Təklif olunan "IPv8" protokolunun fərqləndirici xüsusiyyəti şəbəkə operatorlarına verilən Muxtar Sistem Nömrəsidir (ASN). Yeni ünvan formatı "r.r.r.r.n.n.n.n" şəklində təqdim edilir. Burada "r" fraqmenti 32 bitlik tam ədəd formasında ASN-i, "n" isə adi "IPv4" ünvanını bildirir. Sıfır marşrutlaşdırma prefiksinə malik "IPv8" ünvanı avtomatik olaraq "IPv4" ünvanına çevrilir. Bu isə o deməkdir ki, yeni sistemə keçid üçün yalnız "region kodlarını" emal edən serverlər tələb olunur, stekin qalan hissəsi isə dəyişməz qalır.
Ünvan tutumu və üstünlükləri
Yeni arxitektura sayəsində hər bir ASN operatoruna 2³² və ya 4 294 967 269 ünvan ayrılır. Layihə müəllifinin sözlərinə görə, bu rəqəm istənilən təşkilat üçün kifayətdir, lakin xüsusilə nəhəng şirkətlərə bir neçə nömrə də verilə bilər. Nəticədə, "IPv4" rəqəmsal fəzası təxminən 30 trilyon (3 × 10¹³) unikal ünvana qədər genişlənir. Bu göstərici "IPv6" standartındakı 340 undesilyon (3,4 × 10³⁸) ünvandan az olsa da, köhnə sistemdən tamamilə imtina etmək ehtiyacının aradan qalxması bu fərqi kompensasiya edir.
İnfrastruktur və maliyyələşmə
Şəbəkənin hər bir seqmenti üçün bütün zəruri xidmətlər əvvəlcədən nəzərdə tutulub. Bunlara ünvanların təyini (DHCP8), domen adları (DNS8), vaxtın sinxronizasiyası (NTP8), telemetriyanın toplanması (NetLog8), autentifikasiya məlumatlarının keşlənməsi (OAuth8), marşrutların yoxlanılması (WHOIS8), girişə nəzarət (ACL8) və "IPv4" / "IPv8" tranzaksiyası (XLATE8) daxildir.
Hazırda Ceyms Teyn açıq mənbəli proqram təminatı, tədqiqat və sınaq infrastrukturu, həmçinin nümayiş versiyaları və sənədləşmə hazırlamaq üçün 100 min ABŞ dolları toplamağa çalışır. Bu vəsait "IPv8" protokolunun real şəraitdə tam işləkliyini və səmərəliliyini sübut etməyə imkan verəcək.
