"Honor" şirkəti çoxdan gözlənilən altı yüzüncü seriya smartfonlarının buraxılış tarixini rəsmən elan edib. "Honor 600" və "Honor 600 Pro" modellərinin qlobal premyerası 23 aprel tarixində, Moskva vaxtı ilə saat 11:00-da baş tutacaq. Cihazların adları artıq istehsalçının rəsmi səhifəsində yerləşdirilib. Hazırda ilk alıcılar üçün xüsusi kampaniya keçirilir: qeydiyyatdan keçən istifadəçilər 150 avro məbləğində endirim əldə etmək və aksesuarların uduşunda iştirak etmək imkanı qazanırlar.
Rəsmi elandan cəmi bir neçə saat əvvəl "Honor 600 Pro" modelinin real görüntüləri internetə sızıb. Yalnız Çin bazarı üçün nəzərdə tutulmuş "Honor 500 Pro" ilə müqayisədə yeni cihazın dizaynında ciddi yeniliklər var. Xüsusilə, smartfonun yenilənmiş kamera bloku açıq şəkildə "iPhone 17 Pro" dizaynından ilhamlanıb.
Son məlumatlara görə, baza modeli olan "Honor 600" smartfonu "Snapdragon 7 Gen 4" çipseti ilə, "Honor 600 Pro" isə 8-ci seriya "Snapdragon" prosessoru ilə təchiz ediləcək. Hər iki telefonun 1,5K təsvir ölçülü və 120 Hz yenilənmə tezliyinə malik 6,59 düymlük OLED ekranla təqdim olunacağı gözlənilir. Bundan əlavə, cihazların yan panelində xüsusi "AI" düyməsi yer alacaq.
Kamera imkanlarına gəldikdə, mənbələr hər iki cihazın optik görüntü sabitləşdirmə (OIS) funksiyalı 200 meqapiksellik əsas sensor və genişbucaqlı modul alacağını iddia edirlər. Pro versiyası isə əlavə olaraq teleobyektivlə təchiz ediləcək. Yeni smartfonların ən diqqətçəkən xüsusiyyətlərindən biri də onların 9000 mAh tutumlu nəhəng batareyaya sahib olmasıdır.
