Şirkətlər məhsullarının reklamı üçün hazırlanan fotolarda dekorativ elementlərdən tez-tez istifadə edirlər, lakin Govee-nin seçimi sosial mediada müzakirələrə səbəb olub. Şirkətin veb-saytında yerləşdirilən və uşaq otağını təsvir edən fotoda kitab rəfində üzərində "White Supremacy" yazılmış kitabın iki nüsxəsi görünüb.
Bu görüntünün süni intellekt vasitəsilə yaradılıb-yaradılmadığı və ya dizayner səhvi olduğu hələlik dəqiq deyil. Arxiv məlumatlarına görə, sözügedən şəkil ən azı 11 aprel 2026-cı il tarixindən etibarən saytda mövcud olub. Govee-yə edilən sorğudan sonra şəkil saytdan dərhal silinib.
Araşdırmalar zamanı məlum olub ki, kitab real nəşrdir və "State of White Supremacy: Racism, Governance, and the United States" adlı esse toplusuna bənzəyir. Uşaq otağı üçün nəzərdə tutulan dekorativ işıqlandırma reklamında belə bir kitabın yer alması qeyri-etik və təsadüfi bir seçim kimi qiymətləndirilir. Fotodakı digər kitab isə Jefferson Hack-in "Another Art Book" əsəridir.
Qeyd edək ki, bu kitabla bağlı oxşar qalmaqal 2023-cü ildə Britaniyanın B&Q pərakəndə satış şəbəkəsində də yaşanmışdı. O zaman şirkət üçüncü tərəf satıcının təqdim etdiyi şəklin yoxlama prosesindən keçmədiyini bildirərək üzr istəmişdi.
