"Google" şirkəti veb üzərində istifadəçilərin əvəzinə müxtəlif tapşırıqları yerinə yetirmək üçün nəzərdə tutulmuş eksperimental "Project Mariner" xidmətini rəsmən bağlayıb. "Wired" nəşrinin jurnalisti Maxwell Zeff tərəfindən verilən məlumata görə, layihənin rəsmi səhifəsində xidmətin 4 may 2026-cı il tarixində dayandırıldığı və onun texnologiyalarının digər "Google" məhsullarına keçirildiyi bildirilir.
İlk dəfə 2024-cü ilin dekabrında təqdim edilən "Project Mariner", sonradan eyni anda 10-a qədər tapşırığı icra edə biləcək şəkildə yenilənmişdi. Ötən bir il ərzində "Google" bu layihənin imkanlarını özünün digər süni intellekt alətlərinə, o cümlədən e-poçtları arxivləşdirə və ya otel rezervasiyası edə bilən "Gemini Agent" xidmətinə inteqrasiya edib. Həmçinin, layihənin agent imkanları "AI Mode" adlı axtarış funksiyasına da əlavə olunub.
Bu ilin əvvəlində "Google" şirkəti "Chrome" brauzerində uçuş qiymətlərini araşdırmaq kimi çoxmərhələli tapşırıqları icra edə bilən "auto-browse" adlı yeni süni intellekt funksiyasını nümayiş etdirmişdi. Şirkət bu funksiyanın "Project Mariner" tərəfindən dəstəklənib-dəstəklənmədiyini açıqlamasa da, bu addım "OpenAI", "Perplexity" və "OpenClaw" kimi rəqiblərin təqdim etdiyi agent veb-brauzer alətlərinə cavab kimi qiymətləndirilir.
"Project Mariner" layihəsinin ləğv edilməsi, 19 may tarixində başlayacaq bu ilki "I/O" tədbirində nümayiş etdirilə biləcək digər yeni süni intellekt funksiyaları üçün yer açmaq məqsədi daşıya bilər. "The Verge" nəşrinin məsələ ilə bağlı şərh sorğusuna "Google" hələlik heç bir rəsmi cavab verməyib.
