"Google" şirkəti bu ilin əvvəlində təqdim etdiyi "Personal Intelligence" (Fərdi İntellekt) funksiyasının istifadəçi bazasını əhəmiyyətli dərəcədə genişləndirir. Bu yenilik "Gemini" çatbotuna istifadəçinin digər "Google" xidmətlərindəki məlumatlarını söhbət kontekstinə əlavə etməyə imkan yaradır. Sistem "Gmail", "Google Foto", "YouTube" və "Google Axtarış" kimi xidmətlərdən əldə edilən məzmunu və tarixçəni təhlil edir. Nəticədə, süni intellekt istifadəçi sorğularını daha dəqiq və fərdi şəkildə cavablandıra bilir.
Məsələn, süni intellekt "Google Foto" xidmətindəki şəkillərə əsasən avtomobilin marka və modelini müstəqil şəkildə müəyyən edərək, təkərlərlə bağlı suallara asanlıqla cavab tapa bilər. Əgər sistem lazımi məlumatı avtomatik tapa bilməsə, çatbot çatışmayan detalları doldurmaq üçün birbaşa istifadəçiyə müraciət edir. İlkin mərhələdə yalnız ABŞ-da "AI Pro" və "AI Ultra" ödənişli tariflərinin abunəçiləri üçün nəzərdə tutulan bu funksiya, 15.04.2026-cı il tarixindən etibarən daha geniş auditoriyaya təqdim edilir.
Hazırda bu imkan İsveçrə, Böyük Britaniya və Avropa İqtisadi Zonasındakı ölkələr istisna olmaqla, bütün dünyada aktivləşdirilir. Bahalı paketlərlə yanaşı, daha sərfəli "AI Plus" abunəçiləri də "Gemini" tərəfindən dəstəklənən bütün dillərdə bu təklifdən yararlana biləcəklər. "Google" nümayəndələrinin sözlərinə görə, yaxın həftələrdə heç bir ödənişli abunəliyi olmayan istifadəçilər, ilk növbədə amerikalılar olmaqla, bu fərdiləşdirmə imkanlarına pulsuz çıxış əldə edəcəklər.
