"Etsy" platforması istifadəçilərin süni intellekt tərəfindən yaradılmış və çaşdırıcı məzmunlarla bağlı narahatlıqlarını aradan qaldırmaq üçün ciddi addımlar atır. Şirkətin rəsmi açıqlamasına görə, bir çox alıcı hansı məhsulun süni intellekt vasitəsilə hazırlandığını müəyyən etməkdə çətinlik çəkir. Bu səbəbdən, satıcıların əməyini qorumaq və şəffaflığı təmin etmək məqsədilə yeni siyasət tətbiq olunur.
Yeni qaydalara əsasən, hər bir elanda "Etsy" satıcıları real fonda çəkilmiş ən azı bir redaktə olunmamış fotoşəkil yerləşdirməlidirlər. Digər fotoşəkillərdə süni intellekt alətlərindən istifadəyə icazə verilsə də, yekun nəticə mütləq fiziki məhsulu dəqiq əks etdirməlidir. Əgər platforma yüklənən şəkillərdə süni intellekt izləri aşkar edərsə, satıcıya bu barədə məlumat vermək üçün xüsusi bildiriş pəncərəsi təqdim ediləcək.
Süni intellektlə bağlı hansı qadağalar tətbiq olunur?
Platforma "funksional bələdçilər" kateqoriyasına aid olan reseptlər, nümunələr və təlimatlar üçün də yeni tələblər müəyyən edib. Bu cür məzmunlar tamamilə satıcının öz əməyinin məhsulu olmalı və süni intellekt tərəfindən yaradılmamalıdır. Həmçinin, botlar tərəfindən avtomatik yaradılan elanların yerləşdirilməsi tamamilə qadağan edilib.
Süni intellekt vasitəsilə yaradılmış sənət əsərlərinin satışına isə hələ də icazə verilir, lakin satıcı məhsulun süni intellekt tərəfindən hazırlandığını mütləq qeyd etməlidir. Qaydalara əməl etməyən və alıcıya elandakından "əsaslı şəkildə fərqlənən" məhsul göndərən satıcılar pulun geri qaytarılması öhdəliyi ilə üzləşə bilərlər.
