“Ziroth” kanalının müəllifi Ryan Inis Hughes tərəfindən aparılan genişmiqyaslı araşdırma “Donut Lab” şirkətinin bərk cisimli batareya ilə bağlı iddialarının saxta olduğunu sübut edib. Şirkətin rəhbəri Marko Lehtimäki tərəfindən kütləvi istehsala hazır olduğu bildirilən texnologiyanın, əslində standart litium-ion (NMC) batareya dizaynından başqa bir şey olmadığı müəyyən edilib.
Araşdırmaya “Nordic Nano Group”-un keçmiş kommersiya direktoru Lauri Peltola da dəstək verib. Bundan əlavə, Fraunhofer Tədqiqat İnstitutu-ndan Julian Zahnow da daxil olmaqla 20-dən çox müstəqil ekspert batareyanın gərginlik əyrilərini və elektrokimyəvi göstəricilərini təhlil edib. Nəticələr göstərib ki, məhsulun davranışı bərk cisimli batareyalara deyil, ənənəvi litium-ion texnologiyasına xasdır.
“Donut Lab” necə etibar qazanıb?
İddialara görə, Marko Lehtimäki nüfuzlu VTT Texniki Tədqiqat Mərkəzi-ndən yalnız müəyyən testləri keçirməyi tələb edərək, süni legitimlik yaradıb. Şirkət batareyanın 400Wh/kq enerji sıxlığına və 100 000 dövrlük ömrə malik olduğunu iddia etsə də, VTT bu göstəriciləri təsdiqləməyib. Hughes-in araşdırması həmçinin şirkətin texnologiyanın mənşəyini gizlətmək üçün istifadə etdiyi kölgə şirkətlər şəbəkəsini və mümkün maliyyə fırıldaqlarını da ifşa edib.
