Çinin CAS Space şirkəti “Lijian-1 Y14” raketinin sənaye bazasında tam yığıldığını və bütün sınaqlardan uğurla keçdiyini elan edib. Raket artıq buraxılış üçün təsdiq alıb və yaxın vaxtlarda Dunfen meydançasından kosmosa göndəriləcək. Missiya çərçivəsində orbitə səkkiz peyk çıxarılacaq.
Bu hadisə “Lijian-1” raketlərinin seriyalı istehsalının yüksək səviyyəyə çatdığını nümayiş etdirir. Cəmi on gün əvvəl “Lijian-1 Y13” raketi beş peyki uğurla orbitə çatdırmışdı. Bu uğurla “Lijian” ailəsi Çinin kommersiya daşıyıcıları arasında yüzdən çox peyki orbitə çıxaran ilk raket seriyası olub.
“Lijian-1” raketinin texniki göstəriciləri:
- Uzunluq: 30 metr
- Diametr: 2,65 metr
- Başlanğıc kütləsi: 135 ton
- Başlanğıc dartı qüvvəsi: 200 ton
- Yükdaşıma qabiliyyəti: 500 km hündürlükdə günəş-sinxron orbitə 1,5 ton, aşağı yer orbitinə isə 2 tona qədər
Çin Elmlər Akademiyasının Mexanika İnstitutunun rəhbərliyi ilə hazırlanan bu dörd pilləli bərk yanacaqlı raket, 2022-ci il iyulun 27-də ilk uçuşunu həyata keçirib. Hazırda Çinin ən böyük və ən stabil kommersiya raketi hesab olunan “Lijian-1”, unifikasiya edilmiş dizaynı sayəsində bir ay ərzində yığıla bilir və illik istehsal həcmi on raketdən çoxdur.
