19 aprel 2026-cı il tarixində "AST SpaceMobile" şirkətinin "BlueBird 7" peykini fəzaya qaldıran "Blue Origin" şirkətinə məxsus "New Glenn" raketinin buraxılışı qismən uğurla yadda qalıb. Raketin ilk pilləsi heç bir insident yaşanmadan eniş meydançasına qayıdaraq şirkət tarixində mühüm bir mərhələnin əsasını qoyub. Bu, həmin sürətləndirici blokun artıq ikinci uğurlu uçuşu və enişi olub. Nəticədə, Jeff Bezos rəsmən təkrar istifadə edilə bilən kosmik daşıyıcı vasitəyə sahib olub.
Təəssüf ki, "AST SpaceMobile" üçün bu missiya o qədər də uğurlu alınmayıb. Kosmosda mobil rabitə qülləsi rolunu oynamalı olan peyk, raketin ikinci pilləsi tərəfindən nəzərdə tutulduğundan daha aşağı orbitə buraxılıb. Bu texniki xəta peyki funksional baxımdan tamamilə yararsız vəziyyətə salıb.
Şirkətin rəsmi açıqlamasında qeyd edilib:
"Peyk daşıyıcı raketdən ayrılaraq işə düşsə də, mövcud hündürlük onun göyərtəsindəki mühərrik texnologiyası ilə əməliyyatları davam etdirmək üçün həddindən artıq aşağıdır və o, orbitdən çıxarılacaq."Öz növbəsində, Jeff Bezos "X" sosial şəbəkəsində raketin eniş anını əks etdirən videonu heç bir şərh vermədən paylaşıb.
