Keyn Parsonsun ekranlaşdırdığı “Backrooms” filmi prokatda böyük uğura imza atıb. Yalnız cümə günü 38 milyon dollar gəlir əldə edən ekran əsərinin ilk həftəsonu üçün proqnozlaşdırılan gəliri 90 milyon dollara çatır.
Bu nəticə təkcə gözləntiləri aşmaqla kifayətlənmir, həm də A24 studiyasının əvvəlki rekordu olan Aleks Qarlandın “Civil War” filminin 25,5 milyon dollarlıq açılış göstəricisini geridə qoyur. Həmçinin, film “The Mandalorian and Grogu” layihəsinin ilk gündəki 33,7 milyon dollarlıq nəticəsini də üstələyib.
Təxminən 10 milyon dollar büdcəsi olan “Backrooms”un yüksək gəlirliliyi diqqət çəkir. Müqayisə üçün qeyd edək ki, “Star Wars” seriyasının sonuncu layihəsi 165 milyon dollara başa gəlmişdi.
“Backrooms” tənqidçilərdən “Obsession” filmi qədər universal tərif almasa da, əsasən müsbət rəylərlə qarşılanır. Bu uğur, YouTube məzmun yaradıcılarının (o cümlədən “Obsession” filminin müəllifi Karri Barkerin) kino sənayesində də uğurlu nəticələr əldə edə biləcəyini sübut edən növbəti nümunədir.
