Avtomobil sənayesində baş verən texnoloji dəyişikliklər nəqliyyat vasitələrini əsl "yaddaş istehlakçılarına" çevirib. Hazırda "Tesla"-nın dördüncü nəsil avtopilot avadanlıqları 32 GB GDDR6/LPDDR yaddaşdan istifadə edərkən, bu il təqdim olunan 4+ versiyasında bu göstərici 64 GB-a çatdırılıb. Eyni zamanda, bir çox istehsalçının üstünlük verdiyi "Nvidia Orin" platforması da 32 və ya 64 GB operativ yaddaşla təchiz olunur.
Avtomobillərdə yaddaş tələbatı niyə artır?
Bort elektronikasının tələbləri yalnız operativ yaddaşla məhdudlaşmır. İlkin konfiqurasiyalarda əyləncə və sürücüyə yardım sistemləri üçün 40 GB RAM kifayət etsə də, qabaqcıl modellərdə bu rəqəm 100 GB-ı ötür. Xüsusilə, "NAND" tipli yaddaşlarda tələbat daha geniş diapazona malikdir.
- Proqram təminatı: Avtomobillərə "hava vasitəsilə" (OTA) göndərilən yeniləmələr üçün 10 GB-dan 50 GB-a qədər disk sahəsi tələb olunur.
- Avtopilot sistemləri: Avtopilotun işləməsi üçün lazım olan çoxsaylı görüntülərin saxlanması 100 GB ilə 300 GB arasında yaddaş tələb edir.
- İİ-əsaslı sistemlər: Müasir multimedia sistemlərinə inteqrasiya olunan süni intellekt köməkçiləri yaddaş tutumuna olan ehtiyacı daha da artırır.
Nəticə etibarilə, müasir avtomobillərin SSD yaddaş tutumu artıq 500 GB ilə 1,5 TB arasında dəyişir. Sənaye mütəxəssisləri bu tələbatın gələcəkdə hər il daha da artacağını proqnozlaşdırırlar.
