"Asus" şirkəti "Computex 2026" sərgisində "Nvidia GeForce RTX 5090" qrafik kartının xüsusi modifikasiyası olan "ASTRAL-RTX5090" modelini nümayiş etdirib. Mühəndislər standart 12 voltluq gərginliyi 48 volta yüksəltməklə, qrafik kartın enerji istehlakını 600 Vt-dan 1000 Vt-a çatdırmağa müvəffəq olublar. Bu yenilik, yüksək güc tələb edən sistemlərdə kabelin təhlükəsizliyini və səmərəliliyini artırmaq üçün nəzərdə tutulub.
Bu texnologiya necə işləyir?
Yeni yanaşma "12V-2×6" tipli kabelin iş prinsipini dəyişir. Gərginliyin 48 volta qaldırılması nəticəsində cərəyan şiddəti azalır: 1000 Vt güc səviyyəsində cərəyan təxminən 20,8 amper təşkil edir ki, bu da hər bir naqilə düşən yükü 3,5-3,7 amperə qədər endirir. Müqayisə üçün qeyd edək ki, 12 voltluq standart sistemdə 600 Vt güc ötürülərkən hər naqilə 8,3 amper düşür, bu isə daha çox istilik və enerji itkisi deməkdir.
Nə üçün bu yenilik vacibdir?
Nümayiş olunan "ASTRAL-RTX5090" modeli maye soyutma sistemi ilə təchiz edilib və 1200 Vt-a qədər enerji ötürmə qabiliyyətinə malikdir. 48 voltluq arxitektura kabelin qızmasının qarşısını alaraq sistemin ümumi etibarlılığını artırır. "Asus" mütəxəssisləri bildirirlər ki, sistem avtomatik olaraq 12 və 48 volt rejimləri arasında keçid edə bilir, bu da xüsusilə süni intellekt hesablamaları üçün nəzərdə tutulan gələcək qrafik prosessorlarda geniş tətbiq oluna bilər.
