Dünyanın ən böyük litoqrafiya skanerləri təchizatçısı olan "ASML" şirkəti tarixi bir nailiyyətə imza atıb. 3 iyun tarixinə olan məlumata görə, şirkətin bazar kapitallaşması 668 milyard ABŞ dollarına yüksələrək, 2024-cü ilin iyununda "Novo Nordisk" tərəfindən qoyulmuş 650 milyard ABŞ dollarlıq rekordu geridə qoyub. Hazırda bu rəqəm 674 milyard ABŞ dolları səviyyəsinə çatıb.
Bu artımın əsas səbəbi nədir?
Şirkətin dəyərinin artması "JPMorgan" və "Morgan Stanley" banklarının dərc etdiyi analitik hesabatlardan sonra sürətlənib. Mütəxəssislər "ASML"-in bazarın gözlədiyindən daha çox skaner istehsal etmək potensialına malik olduğunu bildiriblər. "JPMorgan" analitiki Sandip Deşpande qeyd edib ki, şirkət istehsal gücünü artırmadan 110-dan çox "Low-NA" skaneri tədarük edə bilər ki, bu da əvvəlki 90 ədədlik proqnozu əhəmiyyətli dərəcədə üstələyir.
İstehsal gücü necə artırılacaq?
"Morgan Stanley" analitikləri hesab edirlər ki, Eindhoven şəhərindəki "Brainport Industries Campus"-un genişləndirilməsi istehsal çatışmazlığı problemini həll edəcək. Sözügedən obyektin tikintisinə 2026-cı ilin üçüncü rübündə başlanılması planlaşdırılır. Bu addım "TSMC", "Samsung" və "Intel" kimi nəhənglərin ehtiyac duyduğu qabaqcıl çiplərin tədarük zəncirini sabitləşdirmək üçün kritik əhəmiyyət daşıyır.
