Bloomberg-in analitiki Mark Qurmanın verdiyi məlumata görə, Apple şirkəti ağıllı eynək bazarına daxil olmaq üçün Apple Watch-un ilk dövrlərində tətbiq etdiyi strategiyadan istifadə etməyi hədəfləyir. Şirkətin bu məhsulu 2026-cı ilin sonu və ya 2027-ci ilin əvvəlində təqdim edəcəyi, satışlara isə 2027-ci ildə başlayacağı gözlənilir.
Apple-ın bu cihazlar üçün hədəflədiyi qiymət aralığı 200-500 dollar təşkil edir. Şirkət bu addımı ilə Meta, Samsung, eləcə də EssilorLuxottica (Ray-Ban, Oakley, Persol), Safilo Group və Warby Parker kimi nəhənglərlə rəqabət aparacaq. Apple rəqiblərindən fərqlənmək üçün yüksək keyfiyyətli materiallardan, xüsusilə də plastikdən daha davamlı və lüks hesab edilən asetatdan istifadə etməyi planlaşdırır.
Hazırda sınaqdan keçirilən dörd əsas dizayn variantı mövcuddur:
- Ray-Ban Wayfarers tərzində böyük düzbucaqlı çərçivə;
- Tim Kukun istifadə etdiyi eynəklərə bənzər nazik düzbucaqlı çərçivə;
- Böyük oval və ya dairəvi çərçivələr;
- Daha kiçik və zərif oval və ya dairəvi çərçivələr.
Yeni cihazlarda daxili displey olmayacaq, çünki bu, artırılmış reallıq (AR) eynəyi deyil. Bunun əvəzinə, eynəklər kamera, mikrofon və sensorlarla təchiz ediləcək. Bu funksiyalar istifadəçilərə foto və video çəkməyə, zəngləri idarə etməyə, bildirişləri almağa və təkmilləşdirilmiş Siri kimi süni intellekt imkanlarından istifadə etməyə şərait yaradacaq.
Qeyd edək ki, Apple hələ də daxili displeyə malik daha təkmil artırılmış reallıq eynəkləri üzərində işləyir, lakin onların bazara çıxarılmasına hələ bir neçə il var.
