ABŞ-ın San-Dieqo şəhərində keçirilən məhkəmə prosesində "Apple" şirkəti patent mübahisəsində məğlub olub. Münsiflər heyəti "iPhone" və "Apple Watch" modellərində tətbiq olunan taktil əks-əlaqə (haptic feedback) texnologiyasının "Taction Technology" şirkətinə məxsus iki patenti pozduğunu müəyyən edib. Məhkəmənin qərarına əsasən, "Apple" 5,72 milyard dollar məbləğində təzminat ödəməlidir.
Mübahisənin tarixi və məhkəmə prosesi
"Taction Technology" şirkəti "Apple"-a qarşı iddia qaldıraraq, texnologiya nəhənginin onların innovasiyalarından qanunsuz şəkildə mənfəət əldə etdiyini bildirib. 2021-ci ildə Kaliforniya məhkəməsinə daxil olan iddia 2023-cü ildə ilkin olaraq rədd edilsə də, sonradan Federal Dairə Apellyasiya Məhkəməsi işin yenidən baxılmasına qərar verib. 5,5 il davam edən hüquqi mübarizə nəhayət "Taction Technology"-nin xeyrinə yekunlaşıb.
"Apple" qərara etiraz edir
Məhkəmənin qərarından sonra "Apple" rəsmi açıqlama yayaraq hökmlə razılaşmadığını və apellyasiya şikayəti verəcəyini bəyan edib. Şirkət nümayəndələri bildiriblər ki, "Apple Taptic Engine" texnologiyası "Taction"-un patentlərindən köklü şəkildə fərqlənir və təyin olunan cərimə məbləği faktlarla dəstəklənmir. "Taction Technology"-nin vəkilləri isə qərarı şirkətin patent hüquqlarının bərpası kimi qiymətləndirərək, bu nəticənin uzun müddətdir gözlənildiyini vurğulayıblar.
