NASA-nın “Voyager-1” kosmik zondunun 13 noyabr 2026-cı il tarixində Yerdən tam olaraq bir işıq günü məsafəsində olacağı gözlənilir. Bu, işığın vakuumda 24 saat ərzində qət etdiyi məsafəyə bərabərdir. Həmin vaxt aparat planetimizdən təxminən 25,9 milyard kilometr uzaqda olacaq.
1977-ci ildə kosmosa buraxılan “Voyager-1” Yupiter və Saturn planetlərinin tədqiqində mühüm rol oynayıb. O, Yupiterin peyklərində vulkanik aktivliyi, Avropa peykində su buzunu, Saturnun isə azotla zəngin atmosferini kəşf edib. 2012-ci ildə zond heliopauzanı keçərək ulduzlararası fəzaya daxil olub.
Texniki vəziyyət və gələcək
Zondun enerji mənbəyi olan pluton-238-in tükənməsi səbəbindən bir çox cihaz söndürülüb. Hazırda aparatın yalnız ən vacib elmi cihazları işlək vəziyyətdədir. Mütəxəssislərin proqnozlarına görə, 2036-cı ilə qədər “Voyager-1”in siqnalları Yerə çatacaq qədər güclü olacaq, lakin bundan sonra əlaqə kəsiləcək.
Maraqlıdır ki, 48 illik səyahətinə baxmayaraq, zond hələ də Günəş sisteminin kənarındakı Oort buluduna çatmayıb. “Voyager-1”in texnologiyası 1970-ci illərin standartlarına əsaslanır və onun kompüter yaddaşı cəmi 68 kilobaytdır. Buna baxmayaraq, aparat bəşəriyyətin kosmosu kəşf etmək yolunda ən böyük uğurlarından biri olaraq qalır.
