"YouTube" istifadəçiləri platformanın veb-pleyerində ciddi problemlərlə üzləşiblər. "Reddit" forumundakı şikayətlərə əsasən, video izləyərkən səs kəsilmələri, kadr atlamaları və əməliyyat yaddaşının kəskin artması müşahidə edilir. Bu xəta əsasən "Firefox" və "Brave" brauzerlərinin istifadəçilərinə təsir göstərir. Nəticədə kompüterin resursları sürətlə tükənir və sistemin ümumi fəaliyyəti zəifləyir. Bəzi hallarda RAM sərfiyyatı bir neçə yüz meqabaytdan bir neçə giqabayta qədər yüksəlir.
"Mozilla" forumundakı tərtibatçıların araşdırmasına görə, problemin əsas səbəbi "YouTube" pleerinin kodundakı render xətasıdır. Bu nasazlıq brauzerləri sonsuz donma dövrəsinə salır. Xəta xüsusilə bəyənmə, bəyənməmə və paylaşma düymələrini özündə birləşdirən "ytd-menu-renderer" teqində yaranır. Sistem vizual elementlərin ölçülərini davamlı olaraq dəyişməyə çalışdığı üçün hesablama resurslarına tələbat kəskin şəkildə artır.
Qeyd olunan menyu ekranın eninə uyğun olaraq düymələri dinamik şəkildə göstərir və ya gizlədir. Ekran daraldıqda "ytd-menu-renderer" teqi düymələrdən birini silir, lakin dərhal sonra yerin kifayət etdiyini düşünərək onu geri qaytarır. Yer əslində dar olduğu üçün kod düyməni yenidən silməyə məcbur olur. Bu proses fasiləsiz təkrarlanaraq brauzeri və kompüteri davamlı hesablama aparmağa məcbur edir. Nəticədə mərkəzi prosessorun (CPU) da yüklənməsində ciddi artım qeydə alınır.
