"YouTube" şirkətinin baş direktoru Neal Mohan çərşənbə axşamı verdiyi açıqlamada "YouTube TV" üçün tam fərdiləşdirilə bilən "Multiview" (çoxlu baxış) funksiyasının istifadəyə verildiyini elan edib. Yenilik sayəsində istifadəçilər canlı yayımları sərbəst şəkildə seçib birləşdirmək üzərində tam nəzarətə sahib olacaqlar. Neal Mohan qeyd edib ki, bu funksiya izləyicilərin uzun müddətdir gözlədiyi fərdi baxış təcrübəsini təmin edəcək. Ekranda eyni anda 4 fərqli yayımı bərkitmək mümkündür.
Qeyd edək ki, "YouTube" bu funksiyanı ilk dəfə 2023-cü ildə məhdud formatda təqdim etmişdi. Həmin vaxt istifadəçilər yalnız əvvəlcədən seçilmiş idman tədbirlərini, xüsusən də "March Madness" turnirini eyni anda izləyə bilirdilər. Qısa müddət sonra bu imkan xəbərlər, biznes və hava durumu kimi digər mövzuları da əhatə edəcək şəkildə genişləndirildi. Keçən il isə şirkət istifadəçilərə bəzi qeyri-idman məzmunları ilə öz "Multiview" ekranlarını yaratmağa imkan verən sınaq mərhələsinə başlamışdı.
Şirkət rəsmisi Allison Toh "The Verge" nəşrinə verdiyi açıqlamada yeni funksiyanın kimlər üçün əlçatan olacağını dəqiqləşdirib. Onun sözlərinə görə, tam fərdiləşdirilə bilən "Multiview" imkanından həm "YouTube TV" abunəçiləri, həm də 10-dan çox xüsusi janr planına abunə olan istifadəçilər yararlana biləcəklər. Bu yenilik platformanın istifadəçi məmnuniyyətini artırmaq istiqamətində atdığı mühüm addımlardan biri kimi qiymətləndirilir.
