"Dragon Age: The Veilguard" oyunundan sonra pərəstişkarların "BioWare" studiyasına olan inamı azalsa da, şirkətin keçmiş əməkdaşları yeni "Mass Effect" layihəsinin potensialına inanırlar. "Mass Effect" və "Mass Effect 2" oyunlarının kinematoqrafik səhnələrinin dizayneri Armando Troisi, "FRVR"-ə verdiyi müsahibədə komandanın peşəkarlığını yüksək qiymətləndirib.
Troisi bildirib ki, hazırkı komanda orijinal trilogiyanın yaradılmasında iştirak etmiş Preston Vatamanyuk və Derek Uotts kimi veteranlardan ibarətdir. O, komandanın kifayət qədər təcrübəli olduğunu və kənardan məsləhətə ehtiyac duymadığını vurğulayıb. Troisi-nin sözlərinə görə, studiyaya yaradıcı azadlıq verildiyi təqdirdə, onlar əsl "sehrli" nəticələr əldə edə bilərlər.
Uğurun açarı nədir?
Mütəxəssis hesab edir ki, "BioWare" süjet xətti, döyüş sistemi və personajların inkişafına fokuslanan tək oyunçu (single-player) layihələrində rəqibsizdir. Lakin bəzi analitiklər, o cümlədən "Newzoo"-dan Emmanüel Rozye, "Electronic Arts"-ın yeni sahiblərinin layihəyə dəstəyi dayandıra biləcəyi ilə bağlı xəbərdarlıq edib.
Qeyd edək ki, yeni "Mass Effect" oyunu ilk dəfə 2020-ci ilin dekabrında elan edilsə də, 2025-ci ilin fevral ayına olan məlumata görə, layihə hələ də ilkin istehsal mərhələsindədir. Altı il ərzində oyun yalnız bir neçə qısa tizerlə təqdim olunub.
