"Microsoft" şirkəti "Windows 11" fərdi kompüterləri üçün yeni "Xbox" rejiminin qlobal yayımına başlayıb. "Steam" platformasının "Big Picture" rejiminə bənzəyən bu yenilik, kompüterdəki tətbiqə tam ekranlı interfeys əlavə edir. Qeyd edək ki, bu funksiya ilk dəfə "Asus" şirkətinin "Xbox Ally" cihazlarında "Xbox Full Screen Experience" (FSE) adı ilə debüt etmişdi.
Şirkətin rəsmi açıqlamasına görə, bəzi seçilmiş bazarlardakı istifadəçilər yeni rejimi artıq bu gün yükləyə bilərlər. Yaxın həftələrdə isə əhatə dairəsi daha da genişləndiriləcək. Yeniliyi əldə etmək üçün sadəcə "Windows 11" üçün ən son sistem yenilənməsini quraşdırmaq tələb olunur.
"Əvvəllər tam ekran təcrübəsi kimi tanınan bu rejimi portativ cihazlarda təqdim etdikdən sonra oyunçu rəylərini diqqətlə dinlədik. Əldə etdiyimiz təcrübələr fərdi kompüterlərdəki yekun versiyanın formalaşmasına birbaşa təsir etdi", - deyə "Xbox" komandası bildirib.
Bundan əlavə, "Microsoft" bu gün "Xbox Ally X" portativ cihazı üçün də təkmilləşdirmələr, o cümlədən "Auto SR" texnologiyasının ilkin versiyasını təqdim edir. Eyni zamanda, "Xbox" konsol sahibləri üçün yeni idarəetmə paneli yenilənməsi yayımlanıb. Bu yenilənmə fərdi oyunlarda "Quick Resume" funksiyasını söndürmək və panelə xüsusi rənglər əlavə etmək imkanı yaradır.
