Populyar foto redaktə platforması "VSCO", fotoqrafiya sahəsində "Adobe"-yə rəqib olacaq yeni "Studio Pro" tətbiqini istifadəyə verib. Hazırda yalnız "iOS" əməliyyat sistemi üçün əlçatan olan tətbiqin, ilin sonuna kimi "macOS" versiyasının da buraxılması planlaşdırılır. Yeni platforma xüsusilə toy, portret, idman və məktəb fotoqrafiyası kimi böyük həcmli layihələrin idarə olunması üçün nəzərdə tutulub.
"Studio Pro" istifadəçilərə kütləvi redaktə (batch editing), istinad şəklinə əsasən üslub uyğunlaşdırma və "VSCO Galleries" vasitəsilə şəkillərin paylaşılması kimi geniş imkanlar təqdim edir. Şirkət yaxın gələcəkdə RAW formatlı şəkillərin dəstəklənməsi, ixrac üçün qabaqcıl seçimlər və aspekt nisbətlərinin tənzimlənməsi kimi yeni funksiyaların əlavə ediləcəyini açıqlayıb.
"VSCO One" abunəliyi nə təklif edir?
Bu ayın sonlarında istifadəyə veriləcək "VSCO One" abunəlik paketi illik 500 ABŞ dolları dəyərində qiymətləndirilib. Bu paket istifadəçilərə "Studio Pro", "Capture", "Galleries", "Workspace", "Sites", "AI Lab" və "Canvas" daxil olmaqla, şirkətin bütün proqram təminatı dəstini təqdim edir. Həmçinin, abunəliyə frilans fotoqraflar üçün biznes mentorluq proqramı da daxildir.
"VSCO" bu addımı ilə foto redaktə və biznes əməliyyatları üçün müxtəlif platformalardan istifadə edən mütəxəssislərin işini asanlaşdırmağı hədəfləyir. Şirkət, bu inteqrasiya olunmuş yanaşmanın "Adobe Creative Cloud Pro" abunəliyinə alternativ olacağını vurğulayır. Beləliklə, fotoqraflar müştərilərlə əlaqə və hazır məhsulların çatdırılması kimi prosesləri vahid ekosistem daxilində həyata keçirə biləcəklər.
