"Valve" şirkətinin 4 may tarixində 99 ABŞ dolları qiymətinə təqdim etdiyi yeni "Steam Controller" qadceti yarım saatdan da az müddətdə tamamilə satılıb. Yüksək tələbat səbəbindən rəsmi saytda ciddi texniki problemlər yaşanıb və bir çox istifadəçi sifariş prosesini tamamlaya bilməyib. Platforma alıcılara tranzaksiyanın yenilənməsində xəta baş verdiyini və bir qədər sonra yenidən cəhd etməyi tövsiyə edən xəbərdarlıq mesajları göstərib.
Bəzi istifadəçilər sifarişi təsdiqlətmək üçün dəfələrlə cəhd etmək məcburiyyətində qalıblar. Şanslı alıcılardan biri vəziyyəti belə təsvir edib:
"Düz 30 dəfə kliklədim və nəhayət işlədi. Bu, "Steam"in yeni növ DRM sistemidir?"Digər istifadəçilər isə bu qədər şanslı olmayıb, çünki satışın başlamasından təxminən 30 dəqiqə sonra bütün ehtiyatlar tükənib. Satışın başlamasından təxminən 1 saat 50 dəqiqə sonra bəzi alıcılar məhsulu yenidən saytda görsələr də, ödəniş mərhələsində anbarın boş olduğu barədə xəta ilə qarşılaşıblar.
Yaranmış qıtlıqdan dərhal istifadə edən möhtəkirlər "eBay" platformasında fəaliyyətə keçiblər. Orijinal dəyəri 99 ABŞ dolları olan cihazın qiyməti təkrar bazarda 250 ABŞ dolları ilə 700 ABŞ dolları arasında dəyişir. Hazırda "Valve"in rəsmi sifariş səhifəsində çatdırılma müddəti altı-on iş günü olaraq göstərilir.
Sifariş prosesində yaşanan bu xaos geymerlərin ciddi narazılığına səbəb olub. Onlar "Valve"dən satış sistemini təcili olaraq təkmilləşdirməyi tələb edirlər. İstifadəçilər xüsusilə yaddaş qıtlığı səbəbindən onsuz da gecikən "Steam Machine" və "Steam Frame" cihazlarının gələcək buraxılışlarında da analoji problemlərin təkrarlanacağından narahatdırlar.
