Rəqəmsal oyun platforması olan "Steam"-in sahibi "Valve" şirkəti, fiziki hədiyyə kartlarının mağazalarda satışına son qoyacağını rəsmən elan edib. 2012-ci ildən bəri davam edən bu proqram, xüsusilə 2017-ci ildə elektron versiyaların tətbiqindən sonra dələduzların əsas hədəfinə çevrilmişdi. Şirkət uzun illər ərzində müxtəlif təhlükəsizlik tədbirləri görsə də, cinayətkarların yeni üsullara uyğunlaşması bu qərarın verilməsini qaçılmaz edib.
"Valve" rəsmiləri bildirib ki, dələduzların fəaliyyəti həm "Steam" istifadəçilərinə, həm də digər xəbərsiz insanlara ciddi ziyan vurur. Bu səbəbdən, şirkət fiziki kartların satışını tamamilə dayandırmaq kimi çətin bir addım atıb. Proqnozlara görə, mövcud fiziki kart ehtiyatları 2026-cı ilin sonuna qədər pərakəndə satış nöqtələrindən tamamilə yığışdırılacaq.
İstifadəçilər üçün nə dəyişir?
Fiziki kartların satışının dayandırılması istifadəçilərin mövcud kartlarını istifadə etməsinə mane olmayacaq. İnsanlar əllərində olan kartları yerli qanunvericilik çərçivəsində istənilən vaxt "Steam" hesablarında aktivləşdirə bilərlər. Bundan əlavə, "Valve" rəqəmsal hədiyyə kartlarının satışını davam etdirəcək və bu prosesi daha da təkmilləşdirməyi planlaşdırır. Xatırladaq ki, şirkət artıq 2025-ci ildə qeydiyyatsız alış-veriş imkanını istifadəyə verərək istifadəçi təcrübəsini optimallaşdırmışdı.
