Mobil cihazlar üçün şəxsi mesajlaşma funksiyasının istifadəyə verilməsindən təxminən bir il sonra, "Meta" nəhayət bu özəlliyi "Threads" platformasının veb versiyasına gətirir. Şirkətin məlumatına görə, hazırda veb üzərindən birbaşa mesajlaşma (DM) sınaqdan keçirilir və yaxın gələcəkdə daha çox istifadəçi üçün əlçatan olacaq.
Veb versiyadakı mesajlaşma səhifəsində istifadəçilər öz gələn qutularını və mesaj istəklərini görə biləcəklər. Mobil tətbiqdə olduğu kimi, burada da hər kəsdən və ya yalnız izlədiyiniz şəxslərdən mesaj qəbul etmək seçimini tənzimləmək mümkündür. Bundan əlavə, şirkət hazırda yalnız mobil cihazlarda mövcud olan qrup çatlarını da veb versiyada sınaqdan keçirməyi planlaşdırır və əlavə idarəetmə funksiyaları üzərində işləyir.
"Threads" rəhbəri Connor Hayes bildirib ki, veb üçün DM funksiyası mobil versiyada mesajlaşma istifadəyə veriləndən bəri ən çox tələb olunan birinci yenilik olub. O qeyd edib ki, ən aktiv istifadəçilər vaxtlarını veb versiyada keçirirlər, çünki onlar iş masası arxasında olarkən platformadan daha uzun müddət istifadə edirlər. Xatırladaq ki, sosial şəbəkə bu yaxınlarda veb platforması üçün xeyli təkmilləşdirilmiş yeni dizaynı da sınaqdan keçirməyə başlayıb.
